भिजिट भिसा प्रयोग गरेर स्पेन गएकाहरुबारे छानबिन गर्न आईजीपी थापालाई गृहमन्त्रीको निर्देशन

काठमाडौं । स्पेन भ्रमण प्रकरणबारे छानबिन गर्न गृहमन्त्री रमेश लेखकले आईजीपी दीपक थापालाई निर्देशन दिएका छन्।

 गृह मन्त्रालयमा आज गृहसचिव गोकर्णमणि दुवाडी र आईजीपी थापासँगको बैठकमा प्रधानमन्त्री केपी शर्मा ओली स्पेन भ्रमणमा जाँदा भिजिट भिसाको प्रयोग गरी गएकाहरूमाथि छानबिन गर्न गृमन्त्री लेखकले आईजीपी थापालाई निर्देशन दिएका हुन् ।

स्पेन भ्रमणमा सरकारी प्रतिनिधि मण्डलबाहेकको टोली गएको विषय के हो?, अरूहरू कुन संस्थामार्फत कसरी गए?, भिसा लगायतका प्रक्रिया तथा प्रबन्ध कसले गर्‍यो?, कसको समन्वयमा गए? भन्ने विषयमा छानबिन गर्न गृहमन्त्री लेखकले थापालाई निर्देशन दिएका हुन्।

केन्द्रीय अनुसन्धान ब्युरो र मानब बेचबिखन अनुसन्धान ब्युरोले यस घटनाको छानबिन तथा अनुसन्धान गर्ने भएको बताइएको छ। यसमा कोही दोषी देखिए कारबाहीसमेत गरिने गृह मन्त्रीको सचिवालयले जानकारी दिएको छ।

प्रधानमन्त्री ओली असार १४ गते स्पेन भ्रमणमा गएका थिए। उनीसहितको प्रतिनिधिमण्डल असार २० गते फर्किएका थिए।

स्पेन भ्रमणबाट फर्किएपछि राष्ट्रिय स्वतन्त्र पार्टी (रास्वपा) की सांसद सोबिता गौतमले असार २४ गते प्रतिनिधि सभाको बैठकमा प्रधानमन्त्री सहभागीसँग स्पेन भ्रमणमा गएकाहरूमध्ये कतिपय स्वदेश नफर्किएको समाचार आएको भनेर बोलेका थिए।

उनको भनाइपछि कतिपय व्यक्तिहरू नेपाल नफर्किएको भनेर समाचारहरू प्रकाशन भएका थिए। सोही विषयमा छानबिन गर्न निर्देशन दिइएको हो।