१५ वर्ष अघिको हेमराज धिताल हत्या घटनाका अपराधी खुलेआम घुम्दै, गराइयो गृहमन्त्रीको ध्यानाकर्षण

काठमाडौं । १५ वर्षअघि हत्या गरिएका दाङका सञ्चार उद्यमी देवीप्रसाद धिताल 'हेमराज' का हत्याराई कारबाही गर्न माग गर्दै गृहमन्त्री रमेश लेखकको ध्यानाकर्षण गराइएको छ । हालसम्म पनि अपराधीहरु खुलेआम घुम्दै गरेको भन्दै उक्त घटनामा संलग्नलाई पक्राउ गरेर कारबाही गर्न गृहमन्त्री लेखकको ध्यानाकर्षण गराइएको हो।

स्व. हेमराजका भाइ पुष्कर धितालको तर्फबाट आज रेडियो तुलसीपुरका स्टेशन प्रमुख तथा सामुदायिक रेडियो प्रचारक संघका केन्द्रीय अध्यक्ष अर्जुन गिरी, प्रेस चौतारीका केन्द्रीय सदस्य एवं लुम्बिनी प्रदेश सह-ईन्चार्ज गणेश आचार्यले हत्यारा पत्ता लगाएर कारबाही गर्न माग गर्दै गृहमन्त्री लेखकलाई ध्याकर्षण पत्र बुझाएका हुन् । 

रेडियो तुलसीपुरका अध्यक्ष रहेका हेमराजको  वि.सं.२०६७ साउन ६ गते अपराह्नमा तुलसीपुर-१२ जसपुरमा अज्ञात समूहले गोली हानी हत्या गरेको थियो।  

स्व.हेमराज

ध्याकर्षण पत्र बुझ्दै गृहमन्त्री लेखकले अपराधीलाई कारबाही गर्नु राज्यको कर्तव्य भएको भन्दै सञ्चार उद्यमी हेमराजका हत्याराको पहिचान गरी कारबाहीको दायरामा ल्याउन प्रहरीलाई निर्देशन दिने प्रतिवद्वता जनाएका छन् ।

'१५ वर्षसम्म पनि सञ्चार उद्यमीका हत्यारा पत्ता नलाग्नु दुस्खद हो ।' गृहमन्त्री लेखकले भने -'ढुक्क हुनुस,यस घटनालाई तत्काल गम्भीर अनुसन्धान गरी कार्वाही गर्न आइजीपीलाई निर्देशन दिन्छु ।'

यो घटना अहिले प्रहरीको केन्द्रीय अनुसन्धान ब्यूरो (सीआईबी) ले गरिरहेको छ । सीआईबीले अनुसन्धान थाले पनि अनुसन्धानमा उपलब्धी भने शून्य भएको मृतक हेमराजका भाई पुष्करको गुनासो छ । हेमराजका अनुसार प्रहरीले हालसम्म हत्याराको स्केच समेत तयार पार्न सकेको छैन्। 

सामुदायिक रेडियो प्रचारक संघका अध्यक्ष गिरीले गृहमन्त्री ज्युसँगको भेटबाट स्व.हेमराजको हत्यामा संलग्न कारबाहीको दायरामा आउनेमा केही आशावादी रहेको बताए।