कारागारबाट छुट्ने भन्दा थपिनेको संख्या बढी

काठमाडौं । कारागार कार्यालय चितवनबाट एक वर्षमा छुटेर जानेभन्दा थपिनेको सङ्ख्या बढेको छ । विभिन्न मुद्दामा फैसला हुन बाँकी भएर वा फैसला भएर आएका कैदीबन्दीको सङ्ख्या छुटेर जानेको भन्दा धेरै रहेको पाइएको हो । 

कार्यालयका सूचना अधिकारी चेतनाथ ढुङ्गानाका अनुसार गत आर्थिक वर्षमा कारागार कार्यालयमा ८ सय ८ जना कैदीबन्दी नयाँ थपिएका छन् । यस्तै, सोही समयमा ६ सय ७२ जना छुटेको उनले जानकारी दिए । उनका अनुसार थपिएका कैदीबन्दीमध्ये १ सय ५० जना नवलपरासी (बर्दघाट–सुस्ता पूर्व)का हुन् भने अन्य चितवनका छन् । 

गत वर्षमा यस कारागारबाट स्थानान्तरण भएर विभिन्न कारागार गएका कैदीहरूको सङ्ख्या १ सय ४५ जना छ । यस्तै, उपचारका लागि विभिन्न कारागारबाट आउने कैदी ६ जना रहेको उनले जानकारी दिए। 

उक्त अवधिमा ४२ जनाले ‘प्यारोल’ सुविधा लिएका छन्। प्यारोल सुविधाका लागि एक वर्षभन्दा बढी कैद तोकिएका र दुई तिहाइ कैद भुक्तान गरेका हुनुपर्ने हुन्छ।

कारागारमा गत आर्थिक वर्षमा दुई जना कैदीबन्दीको मृत्यु भएको उनले जानकारी दिए । क्यान्सर रोगका कारण उनीहरूको मृत्यु भएको हो । अहिले कारागार कार्यालयमा ७ सय ३० जना छन् । जसमध्ये ६ सय ८४ जना पुरुष र ४६ जना महिला रहेका छन् । तीसँग आश्रित पाँच जना बालबालिका रहेका छन् । कारागारमा ४ सय ७० पुरुष र ३५ जना महिला राख्ने क्षमता रहेको छ । रासस।