सप्तरीमा प्रहरीले गोली चलाउदा एक जनाको मृत्यु

काठमाडौं । प्रहरीले  सप्तरीमा मदिरा नियन्त्रण गर्ने क्रममा   गोली चलाउँदा एक जनाको मृत्यु भएको छ । गए राति गोली लागेर मृत्यु हुनेमा राजगड गाउँपालिका-२ निवासी लालु यादवको रहेको मधेस प्रदेश प्रहरी कार्यालयले जानकारी दिएको छ । 

मदिरा भण्डार गरिएको ठाउँमा प्रहरीले गए राति राति सर्च अप्रेसन चलाउँदा मदिरा तस्करसँग भएको झडपमा प्रहरीले चलाएको गोलीबाट यादवको मृत्यु भएको हो।

प्रहरीका अनुसार सीमा नजिकबाट भारी मात्रामा मदिरा भण्डार गरी तस्करी भइरहेको सूचना आएको थियो, सोही सूचना बमोजिम सर्च अप्रेसन चलाउँदा तस्कर र प्रहरीबिच झडप भएको थियो।

तस्करहरुले प्रहरीलाई घेरा हालेर ढुङ्गामुढा प्रहार गर्न थालेपछि आत्म रक्षाको लागि प्रहरीले ७ राउन्ड गोली चलाएको प्रहरीले बताएको छ। जस क्रममा यादवको तिघ्रामा गोली लागि घाइते भएका थिए। 

अस्पतालमा उपचारको लागि लैजाने क्रममा बाटोमा उनको मृत्यु भएको प्रहरीले जानकारी दिएको छ । जिल्लाको राजगड गाउँपालिका  वडा नम्बर–२ स्थित कमलपुरमा सर्च अप्रेसन गर्दा तस्कर र प्रहरीबिच भीडन्त भएको थियो । उक्त ठाउँबाट प्रहरीले ८० कार्टुन विभिन्न ब्रान्डको रक्सी बरामद गरेको जानकारी दिएको छ ।