तस्करी गरेर ल्याइएको २ लाख ७१ हजारको विद्युतीय सामग्री सुर्खेत प्रहरीको नियन्त्रणमा

सुर्खेत । सुर्खेत प्रहरीले ठुलो परिमाणमा आज साँझ विद्युतीय सामग्री बरामद गरेको छ।

जिल्ला प्रहरी कार्यालय सुर्खेतका अनुसार नेपालगन्जबाट सुर्खेत आउँदै गरेको क.प्र ०२-००१ प. ८४१९ न.को मो.सा चेकजाँच गर्ने क्रममा भन्सार छली गरेर ल्याइएको २ लाख ७१ हजार बढीका ती विद्युतीय  सामग्री बरामद गरिएको हो।

सुर्खेतको भेरीगंगा नगरपालिका-५ अस्थायी बबई प्रहरी चेकपोस्टबाट असई हर्क बहादुर तिरुवाको कमाण्डको टोलीले आज साँझ साढे ५ बजे २० थान मोवाइलका चिप्स, ३० पिस बटन,१० थान चार्जर, ५- थान होल्डर र जम्पर, ५ थान मोबाइलको भित्री कभर, ४० थान मोबाइल कभर,४ पिस झोल पेस्ट, ५ थान सानो मोबाइल डिस्प्ले,१६७ थान ठुलो मोबाइल डिस्प्ले बरामद गरेको जिल्ला प्रहरी कार्यालय सुर्खेतले जानकारी दिएको छ।

सुर्खेत प्रहरीका अनुसार बरामद गरिएको २ लाख ७१ हजार ७५० रुपैयाँ  बराबरको सबै विद्युतीय सामग्री र अवैध ओसारपसारमा प्रयोग भएको उक्त मोटरसाइकललाई आबश्यक कारबाहीका लागि सुर्खेत ल्याइएको छ।