५ सय १२ जनाको नेपालगञ्ज नाकाबाट उद्दार, १४ जनालाई भारतबाट गरियो उद्धार

नेपालगञ्ज । माइती नेपालले जोखिमपूर्ण यात्रामा रहेका ५१२ जनालाई नेपालगञ्ज नाकाबाट उद्दार गरेको छ । माइती नेपाल नेपालगञ्जले आज नेपालगञ्जमा आयोजना गरेको आर्थिक बर्ष २०८१-८२ मा गरेका गतिविधिहरुको सामाजिक परीक्षण कार्यक्रममा संयोजक केशब कोइरालाले पछिल्लो एक बर्षको तथ्यांक प्रस्तुत गरेका हुन् । 

माइती नेपाल नेपालगञ्जले भारतबाट १४ जनाको उद्दार गरेको जनाएको छ । यो वर्ष ८ सय १७ वटा खोजतलासको निवेदन परेको छ । त्यसमध्ये ४ सय ३७ जना फेला परेका छन् ।

कार्यक्रममा बोल्ने बक्ताहरुले मानव बेचबिखन रोक्न सबैको हातेमालो आवश्यक रहेकोमा जोड दिए । मानव बेचबिखन संगठित अपराध भएकाले यसलाई रोक्न सरकारी तथा गैरसरकारी संघ संस्थाको हातेमालो आवश्यक रहेकोमा उनीहरुको जोड छ । जिल्ला समन्वय समितिका उपसंयोजक सीता कार्की, बैजनाथ गाउँपालिकाका उपाध्यक्ष निर्मला रोकाय, सहायक प्रमुख जिल्ला अधिकारी पूर्णबहादुर खत्री, जिल्ला प्रहरी कार्यालय बाँकेका प्रवक्ता प्रहरी नायव उपरीक्षक दिपक पातली, नेपालगञ्ज उपमहानगरपालिकाका महिला, बालबालिका तथा जेष्ठ नागरिक शाखा प्रमुख पवित्रा पुरी, महिला विकास अधिकृत आशा शाही, नेपाल पत्रकार महासंघ बाँकेका अध्यक्ष नवीन गिरी, अधिकारकर्मी कमला पन्त लगायतले सामाजिक सञ्जालको दुरुपयोगले मानव बेचबिखनको जोखिम बढाएको बताउँदै यसलाई रोक्न सबै पक्ष लाग्नुपर्नेमा जोड दिएका थिए । 

माइती नेपालले जोखिमपूर्ण यात्रामा रहेकालाई नाकामै रोकेर अभिभावकको जिम्मा लगाउने गर्दछ । उसले विभिन्न दिवसहरुमा नाकामा जनचेतनामूलक पर्चा, पम्प्लेट बाँड्ने, सडक नाटक देखाउने, अन्तरदेशीय कार्यशाला गर्ने गर्दछ । माइती नेपाल नेपालगञ्जका संयोजक कोइरालाले खोजतलास तथा उद्दारका लागि धेरै निवेदन आउने र भारत तथा तेस्रो मुलुकबाट उद्दार गर्नुपर्ने हुँदा त्यहाँ सरकारी संयन्त्र नहुँदा उद्दारमा समस्या हुने गरेको बताए । उनले भारतबाट त्यहाँको संघ संस्थाको सहयोग लिएर उद्दार गर्ने गरेको जानकारी दिए ।