लूटपाट भएका २६८ थान हतियार सुरक्षाकर्मीद्वारा बरामद

काठमाडौं । सुरक्षा निकायले देशभरबाट लूटपाट भएका २६८ थान हतियार बरामद गरेको छ। जेन-जीको सोमबार र मंगलबारको प्रदर्शनपछि तीन दिनको अवधिमा २६८ थान हतियार बरामद भएको प्रहरीले जानकारी दिएको छ।

प्रदर्शनपछि मंगलबार राति १० बजेदेखि सेना परिचालन भएको थियो। सुरक्षा निकायका तीनवटै निकायस नेपाल प्रहरी, नेपाली सेना र सशस्त्र प्रहरीले शुक्रबारसम्म सो परिमाणमा हतियार बरामद गरेको हो।

प्रदर्शनका क्रममा प्रदर्शनकारीहरूले सुरक्षाकर्मीको हतियार पनि खोसेका थिए। ती हतियार फिर्ता गर्न नेपाली सेनाले आह्वान पनि गरेको छ। फिर्ता नगरे कारबाही गर्ने चेतावनी समेत दिएको छ।

त्यस्तै देशका विभिन्न कारागारबाट फरार भएका कैदीहरूलाई पनि सुरक्षाकर्मीले नियन्त्रणमा लिइ पुनः कारागार चलान गरिरहेको छ। फरार कैदी र थुनुवाहरूलाई पनि कारागारमा फर्कन आग्रह गरेको छ।

सुरक्षा निकायले विभिन्न व्यापारिक भवनहरु तोडफोडपश्चात त्यहाँबाट लुटिएका सामानहरू पनि फिर्ता गर्न सम्बन्धित व्यक्तिहरूलाई आग्रह गरेको छ।नेपाल प्रहरीले शुक्रबार सूचना जारी गर्दै सार्वजनिक तथा निजी सम्पत्ति तोडफोड र आगजनी गर्नेको तस्बिर र भिडिओ भए उपलब्ध गराउन आग्रह गरिसकेको छ। त्यसरी तस्बिर र भिडिओ पठाउनेको परिचय गोप्य राखिने पनि प्रहरीले जानकारी दिएको छ।