डुडुवाले भन्योः आन्दोलनको नाममा विपक्षीद्वारा भ्रामक प्रचार, गलत कार्य गर्नेहरुको नाम सार्वजनिक

बाँके । जेनजीले गरेको आन्दोलनका क्रममा उत्पन्न परिस्थितिले बाँके डुडुवा गाउँपालिकाको कामकाजमा असहज स्थिति सिर्जना भएको छ । उत्पन्न असहज परिस्थितिका कारण अहिले कार्यालयको सम्पूर्ण सेवा प्रभावित भएको गाउँपालिकाले जनाएको छ ।

पालिकाका जनप्रतिनिधिहरुले शुक्रबार संयुक्त विज्ञप्ति जारी गर्दै जेनजीको नाममा केही उच्छृंखल समूह पालिकाभित्र प्रवेश गरी प्रमुख प्रशासकीय अधिकृत अशोक कुमार पाण्डेयमाथि कुटपिट र दुव्र्यवहार गरेको घटनाप्रति गम्भीर आपत्ति जनाएको छ । भदौ २५ गते राती करिब साढे ८ बजेको समयमा ८–१० जनाको समूहले कार्यालयमा तोडफोड गरी कार्यालयको कागजात आगजनी गरेको विज्ञप्तिमा भनिएको छ । ‘२६ गते फेरि अर्को समूह कार्यालयमा प्रवेश गरी प्रमुख प्रशासकीय अधिकृत पाण्डेयमाथि कुटपिट तथा दुव्र्यवहार भएको छ । दुःखद् यो घटनाप्रति हाम्रो गम्भीर ध्यानाकर्षण भएको छ,’ विज्ञप्तिमा उल्लेख छ ।

पूर्व प्रदेश मन्त्री तथा प्रदेश सभा सदस्य भण्डारीलाल यादव र पूर्व प्रदेश मन्त्री विजयबहादुर यादवको नेतृत्वमा करिब ३०-३२ जनाको समूहले कार्यालयमा प्रवेश गरी कुटपिट गरेको पालिकाले विज्ञप्तिमा उल्लेख गरेको छ । उक्त समूहले जबर्जस्ती कार्यालयको भान्सा कोठामा पसी बोरीभित्र राखेर मदिराका बोतल बाहिर ल्याई सामाजिक सञ्जालमा फोटो र भिडियो भाइरल बनाएको भन्दै पालिकाले गम्भीर ध्यानाकर्षण भएको जनाएको छ । विज्ञप्तिमा भनिएको छ–‘पालिकालाई अनावश्यक रुपमा बदनाम गरेको घटना दुःखद छ । आन्दोलनको नाममा घुसपैठ गरी विपक्षी समूहले पालिकालाई बदनाम गर्ने गरी अतिरञ्जित कार्य गरेको हो ।’

पालिका अध्यक्ष नरेन्द्रकुमार चौधरी, उपाध्यक्ष शाहिदा बानो, वडा अध्यक्षहरु पटेश्वर कुर्मी, दुर्गा प्रसाद बर्मा, आमोद कुमार तिवारी, सगिर खाँ, वडा सदस्य राधेश्याम मौर्य लगायत कार्यपालिका सदस्यद्वारा सयुंक्त रुपमा जारी विज्ञप्तिमा भनिएको छ, 'कुन हैसियत र कानुनले जबरजस्ती कार्यालयमा ताला खोलेरे अनावश्यक रुपमा बदनाम गर्ने नियतका साथ गरेको भ्रामक प्रचारबाजीको कार्य खेदजनक छ ।' उक्त समूहले कार्यालयमा ताला लगाएकोले अहिले हानी नोक्सानीबारे एकिन जानकारी नभएको अवस्था रहेको पालिकाले जनाएको छ । स्थानीय प्रशासनसंग जनप्रतिनिधि र कर्मचारीको सुरक्षाको माग गर्दै हालसम्म कार्यालयको सम्पूर्ण सेवा अवरुद्ध रहेको अवस्थालाई तत्काल सहजरुपमा सुचारु गर्ने वाताबरण बनाउन पालिकाले सबै सरोकारवाला निकायलाई अपिल समेत गरेको छ ।