प्रहरी वृत्त कालीमाटीमा आगजनी गर्ने नेतृत्वकर्ता ३८ वर्षीय सचिन खड्का पक्राउ

काठमाडौँ । प्रहरीले कालीमाटी प्रहरी वृत्तमा आगजनी गरेको आरोपमा एक जनालाई पक्राउ गरेको छ। जेनजी आन्दोलनका क्रममा कालीमाटी प्रहरी वृत्त जलाएको आरोपमा प्रहरीले काठमाडौँ महानगरपालिका - १३ घर भएका सचिन खडका उर्फ गोल्डेनलाई पक्राउ गरेको हो।

प्रहरीका अनुसार ३८ वर्षीय खडकामाथि भदौ २४ मा भएको आन्दोलनका क्रममा प्रहरी वृत्त कालिमाटीमा आगजनी गर्ने समूहको नेतृत्व गरेको आरोप रहेको छ । प्रदर्शनको समयमा आगजनी गरेपछि उनी थ्रिनट थ्री राइफल, खुँडा र खुकुरीसहित कालिमाटी प्रहरी वृत्त अघिल्तिर खुसी मनाइरहेको भिडियो सामाजिक सञ्जालमा भेटिन्छ ।   

खडका आफ्नो घर रहेको काठमाडौँ- १३ को वडा कार्यालय पनि आगजनी गरेको अनुसन्धानमा संलग्न अधिकृतहरू बताउँछन् । सोल्टिमोडस्थित वडा कार्यालय आगजनी गर्ने समूहको नेतृत्व पनि उनले नै गरेको आरोपमा प्रहरीले उनीमाथि अनुसन्धान गरिरहेको छ ।

उनीविरुद्ध आपराधिक उपद्रव गर्न नहुने कसुरमा अदालतबाट म्याद लिएर अनुसन्धान भइरहेको जिल्ला प्रहरी परिसर काठमाडौँले जानकारी दिएको छ।

आगजनी र लुटमा संलग्न आरोपीहरूलाई पक्राउ गरेर भद्रकालीस्थित जिल्ला प्रहरी परिसरको हिरासतमा राखेर प्रहरीले अनुसन्धान गरिरहेको छ ।