लागुऔषधसहित ६ जना कारोबारी नेपाल प्रहरीको नियन्त्रणमा

काठमाडौं । प्रहरीले लागुऔषधसहित विभिन्न स्थानबाट आधा दर्जन लागुऔषध कारोबारीलाई नियन्त्रणमा लिएको छ।

प्रहरीले गरेको लागुऔषधविरुद्धको कारबाहीमा रूपन्देहीको मायादेवी गाउँपालिका-६ बेथरीबाट नियन्त्रित लागूऔषध डाईजेपाम ५० एम्पुल, बुप्रेनोर्फिन ५० एम्पुल र प्रोमेथाजाइन ५० एम्पुल सहित २ जनालाई  पक्राउ गरेको छ । 

पक्राउ पर्नेहरूमा सोही गाउँपालिका-२ भिलरहवा बस्ने २३ वर्षीय अक्ष्य कुमार हरिजन र सोही गाउँपालिका-२ पकडी बस्ने २२ वर्षीय गुलाब हरिजन रहेका छन् । लागूऔषध नियन्त्रण ब्यूरो शाखा कार्यालय भैरहवा र इलाका प्रहरी कार्यालय बेथरीबाट खटिएको प्रहरीले भैरहवाबाट कपिलवस्तुतर्फ जाँदै गरेको लु१० प ५८४१ नम्बरको मोटरसाइकलमा सवार उनीहरूलाई उक्त लागूऔषध सहित पक्राउ गरेको प्रहरी प्रधान कार्यालयले जानकारी दिएको छ।

त्यसैगरी कञ्चनपुरक्ल भीमदत्त नगरपालिका-१० गड्डाचौकीबाट नियन्त्रित लागूऔषध बुप्रेनोर्फिन ७२ एम्पुल र प्रोमेथाजाइन ९० एम्पुल सहित २ जनालाई  प्रहरीले पक्राउ गरेको छ । पक्राउ पर्नेहरूमा सोही नगरपालिका-१८ जानकी टोल बस्ने २३ वर्षीय आशिष नेपाली र २४ वर्षीय अर्जुन दमाई रहेका छन् । इलाका प्रहरी कार्यालय गड्डाचौकीबाट खटिएको प्रहरीले भारतबाट नेपालतर्फ आउँदै गरेका उनीहरूलाई उक्त लागूऔषध सहित पक्राउ गरेको हो ।

प्रहरीले लागुऔषधविरुद्धकै कारबाहीम कैलालीको लम्कीचुहा नगरपालिका-४ कौवापुर पूर्णिमा सामुदायिक वन नजिकबाट १ ग्राम खैरो हेरोइन सहित सोही ठाउँ बस्ने २२ वर्षीय खडक सिजाली मगरलाई  प्रहरीले पक्राउ गरेको छ । इलाका प्रहरी कार्यालय लम्कीबाट खटिएको प्रहरीले उनलाई उक्त पदार्थ सहित पक्राउ गरेको हो । 

यस्तै नवलपरासी पश्चिमको रामग्राम नगरपालिका-२ दुर्गा टोल बस्ने १९ वर्षीय शाहरूख कुरैसीलाई नियन्त्रित लागूऔषध नाइट्राभेट ६ सय ३० ट्याब्लेट र स्पास्मो ३ हजार ९ सय ४२ ट्याब्लेट सहित प्रहरीले पक्राउ गरेको छ । जिल्ला प्रहरी कार्यालय नवलपरासी पश्चिमबाट खटिएको प्रहरीले उनको घर तलासी गर्दा उक्त लागूऔषध फेला पारी पक्राउ गरेको हो । 

लागुऔषधसहित आइतबार दिउँसो र आइतबार साँझ पक्राउ परेका ६ जनालाई सम्बन्धित प्रहरी कार्यालयले उनीहरुविरुद्ध लागुऔषध कसुरमा थप आबश्यक अनुसन्धान सुरु गरेको प्रहरी प्रधान कार्यालयले जनाएको छ।