तुलसीपुर कारागारबाट भागेका ४ कैदी पक्राउ,अझै १०७ कैदी फरार

दाङ । दाङको तुलसीपुर कारागारबाट भागेका चार जना कैदीलाई पक्राउ गरेर पुनः कारागार चलान गरिएको छ।पक्राउ पर्नेमा दंगीशरण गाउँपालिका -७ का कुन्जन थापा (आगुऔषध मुद्दा), घोराही उपमहानगरपालिका-२ का मुकेश बिक (करणी मुद्दा), लमही नगरपालिका-८ का मोतिलाल चौधरी (कर्तब्य ज्यान मुद्दा) र सोही ठाउँका ओमप्रकाश घर्ती (चोरी मुद्दाका) रहेका छन् ।

जिल्ला प्रहरी प्रबक्ता डिएसपी चक्रबहादुर शाहले लमहीका दुई जनालाई मंगलबार र बाँकी दुई जनालाई बिहीबार पक्राउ पछि तुलसीपुर कारागारमा बुझाइएको बताए ।

भदौ २४ गते जेन–जी आन्दोलनका क्रममा तुलसीपुर कारागारको दुइवटा ब्लकका कुल दुई सय ५३ कैदी भागेका थिए । ती मध्य एक सय ४६ जना पुनः पक्राउ परेका छन् । अझैं १ सय ७ जना कैदी फरार छन । ती मध्य ८ जना भारतीय नागरिक पनि रहेको तुलसीपुर कारागारका प्रमुख गिरबहादुर सेजुवालले जानकारी दिए ।

कुल १२ जना भारतीय नागरिकले सजाय भुक्तान गरि रहेको भएपनि ४ जना भने उक्त दिन भागेका थिएनन्।

यो बीचमा पुनः पक्राउ परेका मध्य १५ जना दाङ भन्दा बाहिर बिभिन्न जिल्लाहरुमा पक्राउ परेका हुँदा तत्कालका लागि सम्बन्धित जिल्ला कारागारहरुमै राखिएको जेलर सेजुवालले जानकारी दिए ।तुलसीपुर कारागारमा कुल ४ सय ७९ कैदी बन्दी थिए । दुई जना महिला बन्दी भने हालसालै सजाय भुक्तान गरि निस्किएका थिए ।