डीएसपी धर्मराज भण्डारी सर्वोत्कृष्ट अनुसन्धानकर्ता घोषित

काठमाडौँ । नेपाल प्रहरीका डीएसपी धर्मराज भण्डारी  सर्वोत्कृष्ट अनुसन्धानकर्ता घोषित भएका छन् । ७० औँ प्रहरी दिवसको अवसरमा डीएसपी भण्डारीलाई आज प्रहरी प्रधान कार्यालयले सर्वोत्कृष्ट अनुसन्धानकर्ता घोषणा गरेको हो। 

नेपाल प्रहरीको केन्द्रीय अनुसन्धान ब्यूरो (सीआईबी) आ कार्यरत डीएसपी भण्डारीलाई गृहमन्त्री ओमप्रकाश अर्यालले ५१ हजार नगद र प्रशंसापत्र प्रदान गरेका हुन्।

डीएसपी भण्डारी अनुसन्धानमा अब्बल मानिन्छन् । यस वर्षको पूर्ण शान्ति पुरस्कार जिल्ला प्रहरी कार्यालय रामेछापका डीएसपी भोलाकुमार भट्टलाई प्रदान गरिएको छ ।

प्रहरी वृत्त कालिमाटीमा कार्यरत डीएसपी मधुकुमार थापालाई ‘उत्कृष्ट कार्य’ पुरस्कार प्रदान गरिएको छ । भदौ २४ मा उच्छृङ्खल समूहले भद्रकालीस्थित जिल्ला प्रहरी परिसर काठमाडौँमा आक्रमण प्रयास गरेको थियो। डीएसपी थापा नेतृत्वको टोलीले जवाफी कारबाही गरेर सो भवन क्षति हुनबाट जोगाएको थियो । कालिमाटीबाट आएको उनको नेतृत्वको १२० जनाको टिमले कार्यालय भवन जोगाएको प्रहरी अधिकृतहरू बताउँछन् ।

डिल्लीबजार कारागारमा कार्यरत इन्स्पेक्टर दुर्गा राईलाई पनि पुरस्कार प्रदान गरिएको छ । प्रहरी अस्पताल महाराजगन्जका एसएसपी डा।आशिष दत्त, अपराध अनुसन्धान विभागमा कार्यरत एसपी वासुदेव पाठक, जिल्ला प्रहरी कार्यालय कास्कीका डीएसपी हरिबहादुर बस्नेत र उपत्यका अपराध अनुसन्धान कार्यालयका इन्स्पेक्टर अच्युत गिरी लगायतका प्रहरी कर्मचारीलाई प्रशंसा पत्र र पुरस्कार प्रदान गरिएको प्रहरी प्रधान कार्यालयले जानकारी दिएको छ ।