४ वटा बन्दुक र जनावरको हड्डीसहित तीन जना पक्राउ

काठमाडौं । प्रहरीले छुट्टाछुट्टै स्थानबाट ४ वटा बन्दुक, दुई किलो गाँजा र जनावरको हड्डीसहित तीन जनालाई नियन्त्रणमा लिएको छ। प्रहरी प्रधान कार्यालयका अनुसार मकवानपुरबाट २ थान भरुवा बन्दुकसहित ४७ वर्षीय गोपीराम प्रजालाई पक्राउ गरिएको हो।

प्रहरीले मकवानपुरको मनहरी गाउँपालिका-६ हाङ्गलम बस्ने ४७ वर्षीय गोपीराम दुई थान भरूवा बन्दुक, दुई किलो गाँजा र ९ थान जनावरको हड्डीको टुक्रा सहित पक्राउ गरेको हो।

इलाका प्रहरी कार्यालय मनहरी र प्रहरी चौकी सुनाचुरीबाट खटिएको प्रहरीले प्रजाको घर नजिकै करेसा बारीमा रहेको कर्कलो घारीमा लुकाई छिपाई राखेको उक्त बन्दुक तथा लागूऔषध फेला पारी पक्राउ गरेको प्रहरी प्रधान कार्यालयले जनाएको छ।

त्यसैगरी हुम्लाको सिमकोट गाउँपालिका-७ चुकेडी भिर भन्ने स्थानबाट दुई थान भरूवा बन्दुकसहित प्रहरीले दुई जनालाई पक्राउ गरेको छ । पक्राउ पर्नेहरू सोही गाउँपालिका-७ डाँडाफाया बस्ने ६८ वर्षीय अंग बहादुर शाही र ६३ वर्षीय लोक बहादुर शाही रहेका छन् । इलाका प्रहरी कार्यालय मुचुबाट खटिएको प्रहरीले उनीहरूलाई उक्त बन्दुक सहित फेला पारी पक्राउ गरेको हो ।  

सम्बन्धित घटनामा प्रहरीले  पकाउ परेका सबै जनाविरुद्ध म्याद थप गरेर आवश्यक अनुसन्धान गरिरहेको प्रहरी प्रधान कार्यालयले जानकारी दिएको छ।