५ किलो गाँजासहित दुई युवक पक्राउ,मोटरसाइकल नियन्त्रणमा

काठमाडौं । ५ किलो बढी गाँजासहित प्रहरीले दुई जनालाई पक्राउ गरेको छ। सर्लाहीको कौडेना गाउँपालिका-२, फुलपरासीस्थित हुलाकी राजमार्ग खण्डबाट प्रहरीले ५ किलो ३ सय ग्राम गाँजा सहित दुई जनालाई नियन्त्रणमा लिएको हो।

जिल्ला प्रहरी कार्यालय सर्लाहीका अनुसार सुखचैनाबाट फुलपरासीतर्फ जाँदै गरेको मोटरसाइकललाई शंका लागेर जाँच गरेको थियो। चेकजाँचका क्रममा मोटरसाइकलको सिटमुनि प्लास्टिकमा बेरेर राखेको अवस्थामा ५ किलो ३०० ग्राम गाँजा फेला परेको जिल्ला प्रहरी कार्यालयले जनाएको छ।

गाँजा सहित पक्राउ पर्नेहरूमा मोटरसाइकल चालक कौडेना गाउँपालिका-१, सुन्दरपुरका १८ वर्षीय दिप नारायण ठाकुर र पछाडि सवार सोही ठाउँका ३० वर्षीय लोजा बैठा रहेका छन्।

पक्राउ परेका दुवै व्यक्तिलाई मोटरसाइकल सहित नियन्त्रणमा लिएर थप अनुसन्धानका लागि जिल्ला प्रहरी कार्यालय सर्लाहीमा राखिएको प्रहरीले जानकारी दिएको छ।