नेपाल प्रहरी

जेनजी आन्दोलनमा फिल्डमा खटिएका प्रहरी इन्चार्जलाई उपत्यका नछाड्न निर्देशन

सुरक्षाखबर

सोमबार, कात्तिक १७, २०८२

काठमाडौं । प्रहरी प्रधान कार्यालयले जेनजी आन्दोलनमा फिल्डमा खटिएका प्रहरी इन्चार्जलाई उपत्यका नछाड्न निर्देशन दिएको छ। गत भदौ २३ र २४ गते भएका तोडफोड, आगजनी र झडपका घटनाबारे जाँचबुझ आयोगले अनुसन्धान अघि बढाएसँगै प्रहरी प्रधान कार्यालयले उनीहरुलाई सो निर्देशन दिएको हो।

कात्तिक १६ गते काठमाडौं उपत्यका प्रहरी कार्यालयलाई प्रहरी प्रधान कार्यालयले पठाएको पत्रमा उनीहरुलाई उपत्यका नछाड्ने व्यवस्था मिलाउन भनिएको उल्लेख छ।

पत्रमा उल्लेख गरिएको छ, 'जाँचबुझ आयोग, २०८२ का सचिवालय सिंहदरबारको च।नं। १०७ मिति २०८२र०७र१६ गतेको पत्र आवश्यक कार्यार्थ संलग्न राखी पठाइएको व्यहोरा निर्देशानुसार अनुरोध गरिएको छ । सो सम्बन्धमा बढी क्षति भएको क्षेत्रहरूमा खटिएका प्रहरी इन्चार्जहरूलाई सोधपुछका लागि कुनै पनि समयमा आयोगमा उपस्थितिको लागि बोलाउनुपर्ने हुँदा हाललाई काठमाडौं उपत्यका नछाड्ने व्यवस्था मिलाउन अनुरोध गरिएको छ ।'

आयोगले हाल जेनजी आन्दोलनका क्रममा विभिन्न स्थानमा भएका झडप, प्रहरीद्वारा प्रयोग गरिएको बल र त्यसबाट भएका क्षति सम्बन्धी घटनाको प्रत्यक्ष प्रमाण संकलन, साक्षात्कार तथा आवश्यक विवरण लिन थालेको छ ।

प्रकाशित मिति: सोमबार, कात्तिक १७, २०८२

प्रतिक्रिया दिनुहोस्