हिरासतबाट भागेका सहकारी ठगी मुद्दाका प्रतिवादी प्रहरीको नियन्त्रणमा

काठमाडौँ । प्रहरीको हिरासतबाट फरार रहेका स्वर्णलक्ष्मी बहुउद्देश्यीय सहकारी संस्था लिमिटेडको रकम अपचलनमा संलग्न भएका ज्ञान बहादुर बम्जनलाई प्रहरीले पक्राउ गरेको छ । 

गत भदौ २४ गते जेनजी प्रदर्शनको क्रममा जिल्ला प्रहरी परिसर काठमाडौंको हिरासतबाट भागेका ज्ञान बहादुरलाई ठमेलबाट पक्राउ गरिएको जिल्ला प्रहरी परिसर काठमाडौँका प्रवक्ता एसपी पवन भट्टराईले जानकारी दिएका छन् ।

काठमाडौं प्रहरीले स्वर्णलक्ष्मीको रकम अपचलनमा संलग्न अरोपमा पक्राउ गरेर ज्ञान बहादुरलाई म्याद थप गरेर अनुसन्धान गरिरहेकै समयमा जेनजी प्रदर्शनको मौका छोपेर भागेको जिल्ला प्रहरी परिसर काठमाडौंले जनाएको छ।

काठमाडौं प्रहरी परिसरका अनुसार सिन्धुलीको दुधौली नगरपालिका-७ घर भएका ५४ वर्षीय ज्ञान बहादुर गीतेन्द्रबावु राई (जीबी) का जेठान हुन् । पोखरामा सञ्चालित सूर्यदर्शन सहकारीको रकम घोटाला प्रकरणमा उनलाई अदालतले १० लाख धरौटीमा रिहा गर्ने आदेश गरेको थियो ।

जिल्ला सरकारी वकिल कार्यालय काठमाडौँले २०८१ पुस २१ मा रास्वपा सभापति रवि लामिछाने सहित ३९ जनालाई प्रतिवादी बनाएर काठमाडौँ जिल्ला अदालतमा अभियोगपत्र दायर गरेको थियो । त्यसबेला ज्ञान बहादुर प्रतिवादीको सुचीमा परेका थिए ।