इलाका प्रहरी र जिल्ला ट्राफिक प्रहरी कार्यालयमा आगजनी गर्ने ६ जना पक्राउ

काठमाडौं ।  जेनजी आन्दोलनका क्रममा झापाको अनारमनीस्थित इलाका प्रहरी कार्यालय र बिर्तामोडस्थित जिल्ला ट्राफिक प्रहरी कार्यालयमा भएको तोडफोड, ढुङ्गामुढा र आगजनी घटनामा संलग्न रहेको आरोपमा ६ जना पक्राउ परेका छन्।

कोशी प्रदेश प्रहरी कार्यालयका अनुसार तीमध्ये छ जनामाथि प्रहरी कार्यालय र सवारी साधनमा क्षति पुर्‍याएको अभियोगमा अनुसन्धान भइरहेको छ भने एक जनामाथि प्रहरीमाथि ज्यान मार्ने प्रयासको आरोपमा कारबाही अघि बढाइएको छ।

तोडफोड तथा आगजनी प्रकरणमा पक्राउ परेकाहरूमा बिर्तामोड–५ का २२ वर्षीय राजन चौधरी र २० वर्षीय आयुस धिमाल, कन्काई–१ का ४२ वर्षीय गोपाल सङ्ग्रौला, अर्जुनधारा–७ की २४ वर्षीया पूजा मगर र त्यही वडाका २८ वर्षीय सुरज मगर, साथै सुनसरी हरिनगर–१ का २२ वर्षीय साहिल अन्सारी रहेका छन्।

यसैबीच, बिर्तामोड–५ का २६ वर्षीय नवराज राईलाई प्रहरीले एक प्रहरी कर्मचारीमाथि बाँस र डोरी प्रयोग गरी दुर्व्यवहार गर्दै ज्यान मार्ने प्रयास गरेको आरोपमा पक्राउ गरी अनुसन्धान गरिरहेको जनाएको छ।