गृहमन्त्री अर्यालले गरे अवकाश जान लागेको आईजीपी खापुङ्गको बिदाइ

काठमाडौं । गृहमन्त्री ओम प्रकाश अर्यालले बुधबार सिंहदरबारस्थित गृह मन्त्रालयमा आयोजित कार्यक्रममा सेवा निवृत्त हुन लागेका प्रहरी महानिरीक्षक (आईजीपी) चन्द्र कुबेर खापुङ्गलाई शुभकामना सहित बिदाइ गरेका छन् ।

सो अवसरमा गृहमन्त्री अर्यालले ३० वर्ष सेवा अवधि पूरा गरी सेवा निवृत्त हुन लागेका आईजीपी  खापुङ्गलाई बधाई दिँदै, सेवा निवृत्त पश्चातको व्यावसायिक जीवनमा उत्तरोत्तर प्रगतिको कामना गरे ।गृहमन्त्री अर्यालले खापुङ्गलाई अवकाश पछिको दिनमा पनि प्रहरी संगठनलाई सुदृढ गर्न तथा देशको आन्तरिक सुरक्षालाई मजबुत बनाउन योगदान दिने अपेक्षा व्यक्त गरेका थिए ।

त्यस क्रममा गृहसचिव रामेश्वर दंगालले पनि  खापुङ्गले ३० वर्षको प्रहरी सेवामा रही नेपाल र नेपाली जनतालाई पुर्‍याउनु भएको अमूल्य योगदानको प्रशंसा गरे । उनले आगामी दिनमा मुलुकमा शान्ति–सुरक्षा कायम गर्न खापुङ्गले प्राप्त गरेका अनुभव उपयोगी हुने विश्वास व्यक्त गर्दै, खापुङ्गको सेवा निवृत्त जीवन अझ स्वस्थ, रचनात्मक र क्रियाशील रहोस् भन्ने शुभकामना व्यक्त गरे ।

कार्यक्रममा प्रहरी महानिरीक्षक  खापुङ्गले पनि प्रहरी सेवामा रहँदा प्राप्त अनुभवका आधारमा मन्तव्य व्यक्त गर्दै नेपाल सरकार, गृहमन्त्रालयबाट प्राप्त अभिभावकत्व, हौसला, मार्गनिर्देशन, समन्वय, सहकार्य र सद्‌भावप्रति कृतज्ञता प्रकट गरेका थिए।

उक्त कार्यक्रममा मुख्य अनुसन्धान निर्देशक टेकेन्द्र कार्की, प्रहरी अतिरिक्त महानिरीक्षकहरू, गृह मन्त्रालयका वरिष्ठ अधिकारीहरू लगायतको उपस्थिति रहेको थियो ।

आईजीपी खापुङ्ग आज राति १२ बजेदेखि अवकाश जाँदैछन् । सरकारले यसअघि नै नेपाल प्रहरीको ३३ औं आईजीपीमा एआईजी दानबहादुर कार्कीलाई नियुक्त गरिसकेको छ।