दानबहादुर कार्कीले आजदेखि सम्हाल्दै नेपाल प्रहरीको नेतृत्व

काठमाडौं । नेपाल प्रहरीको सर्वोच्च नेतृत्व आजदेखि दानबहादुर कार्कीले सम्हाल्दै छन्। कार्कीले आजदेखि ७९ हजार प्रहरीको नेतृत्व गर्न लागेका हुन् ।

नेपाल प्रहरीको ३० वर्षे सेवा पूरा गरेर गए राति १२ बजेदेखि अवकाश गएका आईजीपी चन्द्रकुवेर खापुङको स्थानमा कार्कीले ३३ औं प्रहरी प्रमुखको जिम्मेवारी पाएका हुन्।

काठमाडौं उपत्यका प्रहरी कार्यालयको प्रमुख रहेका एआईजी कार्कीलाई कात्तिक २५ गरेको मन्त्रिपरिषद् बैठकले  प्रहरीको ३३ औं आईजीपीमा नियुक्त गरेको थियो। उनले आज गृह मन्त्रालयमा दर्ज्यानी चिह्न ग्रहण गरेपछि प्रहरी प्रधान कार्यालयमा औपचारिक रूपमा पदभार ग्रहण गर्ने कार्यक्रम तय गरिएको छ।

गत २४ भदौमा भएको जेनजी आन्दोलनका बेला कार्कीले सोही दिन काठमाडौं उपत्यकाको कमाण्ड सम्हालेका थिए। त्यसअघि २३ भदौमा उपत्यका कमाण्ड एआईजीविहीन रहँदा पनि उनले नेतृत्व लिएका थिए। उपत्यका कमाण्डमा आउनुअघि उनी प्रहरी प्रधान कार्यालयमा मानव स्रोत तथा साधन विभागका प्रमुखका रूपमा कार्यरत थिए।

यसअघि डीआईजी रहँदा उनले लुम्बिनी प्रदेश प्रहरी कार्यालयको कमाण्ड सम्हालेका थिए। त्यसअघि एसएसपीका रूपमा काठमाडौं जिल्ला प्रहरी परिसरको नेतृत्व गर्दा चर्चित भुटानी शरणार्थी प्रकरणको अनुसन्धान अघि बढिरहेको समय थियो।

काठमाडौँदेखि उपत्यका स्तरसम्मको चुनौतीपूर्ण कमाण्ड सम्हाल्दै आएका कार्की इमानदार र अनुशासित प्रहरी अधिकृतका रूपमा परिचित छन्। कुनै पनि आर्थिक विवादमा नजोडिएका उनी फील्डदेखि आईजीपी सचिवालयसम्मको व्यापक अनुभव बोकेका छन्।

विभिन्न अन्तर्राष्ट्रिय तालिम लिइसकेका कार्की नेपाल प्रहरीका केन्द्रीय प्रवक्ताको जिम्मेवारी पनि सम्हालीसकेका छन् ।