वरिष्ठ सईसम्मलाई २ लाख आकस्मिक कर्जा दिने आईजीपी कार्कीको पहिलो निर्णय

काठमाडौं। नेपाल प्रहरीका नवनियुक्त आईजीपी दान बहादुर कार्कीले 'आकस्मिक सहुलियत अल्पकालीन कर्जा’ दिने  पहिलो निर्णय गरेका छन् । 

आईजीपी कार्कीले आज पदभार ग्रहण गर्दै प्रहरीका कार्यालय सहयोगी देखि प्रहरी वरिष्ठ नायव निरीक्षक (वरिष्ठ सई) सम्म र उनीहरुका आश्रित परिवारहरूलाई २ लाख रुपैयाँसम्मको आकस्मिक सहुलियत अल्पकालीन कर्जा दिने निर्णय गरेका हुन् ।

प्रहरी प्रधान कार्यालयका अनुसार उनीहरुको आकस्मिक अवस्था (स्वास्थ्य, शिक्षा, घरायसी समस्या लगायत) मा आवश्यकता पूर्ति गर्नका लागि किस्ताबन्दी कर्जा कार्यक्रम अन्तर्गत १ वर्षभित्र कर्जा चुक्ता गरिसक्नु पर्नेछ ।

साथै उक्त रकम उपलब्ध गराउन प्रहरी कल्याण कोषबाट चालु आ.व.२०८२-०८३ मा अधिकतम १० करोड रुपैयाँ सम्मको कोष खडा गरी नेपाल प्रहरी प्रधान कार्यालय कल्याण महाशाखाबाट आवश्यक मापदण्ड बनाई कर्जा प्रवाह गर्ने निर्णय गरिएको प्रहरी प्रधान कार्यालयले जनाएको छ।

आकस्मिक सहुलियत अल्पकालीन कर्जा रकम २ लाख रूपैयाँ ५ प्रतिशत ब्याजदरमा  उपलब्ध गराउने निर्णय भएको प्रहरी प्रधान कार्यालयले जानकारी दिएको छ।