काठमाडौँ । गृहमन्त्री ओमप्रकाश अर्यालले शनिबार प्रहरी वृत्त थानकोट र प्रहरी प्रभाग नागढुंगाको अवलोकन गरेका छन्। केही दिनअघि जेनजी विरोध प्रदर्शनका क्रममा आगजनीबाट क्षति पुगेका यी दुबै संरचना मर्मत सम्पन्न भएपछि पुनः सञ्चालनमा आएका हुन्।
भदौ २४ मा उच्छृङ्खल समूहले थानकोट र नागढुंगास्थित प्रहरी कार्यालयमा आगजनी गरेका थिए। त्यसपछि तत्काल मर्मत तथा रंगरोगनका काम पूरा गरी प्रहरी सेवाहरू यथास्थानबाट नै सुरु गरिएको हो। थानकोट प्रहरी वृत्तको नयाँ भवन उद्घाटन भएको नौ दिनमै प्रदर्शनकारीले आगजनी गरेका थिए। उक्त भवनको भदौ १६ मा तत्कालीन एआईजी टेकबहादुर तामाङले उद्घाटन गरेका थिए।
निरीक्षणका क्रममा उपत्यका प्रहरी कार्यालयका डीआईजी ओम अधिकारी, काठमाडौँका एसएसपी रमेश थापा तथा स्थानीय प्रहरी अधिकारीहरू उपस्थित थिए। ब्रिफिङका क्रममा थानकोटकी डीएसपी एलिजा गिरीले आफ्नो टोलीले प्रदर्शनको बेलामा हातहतियार, गोलीगठ्ठा तथा सवारीसाधन जोगाउन सफल रहेको जानकारी दिइन्।
गृहमन्त्री अर्यालले प्रहरी कर्मचारीको रासन सुविधा अन्य सुरक्षा निकायको स्तरमा पुर्याउने तयारी अन्तिम चरणमा पुगेको बताए। साथै, आन्दोलनका क्रममा प्रहरी कर्मचारीले व्यहोरेका व्यक्तिगत क्षति कसरी पूर्ति गर्ने बारे मन्त्रालयभित्र छलफल जारी रहेको उनले उल्लेख गरे।
