वडाध्यक्ष विन्देश्वर यादव हत्या घटना: सहायक हवल्दारसहित चारै जना पक्राउ, पेस्तोल बरामद

काठमाडौँ । धनुषाको मिथिला बिहारी नगरपालिका–९ का वडाध्यक्ष विन्देश्वर यादवको गोली प्रहार गरी हत्या भएको घटनामा संलग्न भएका चार जनालाई प्रहरीले नियन्त्रणमा लिएको छ।

पक्राउ परेका व्यक्तिहरूमा ३५ वर्षीय शम्भु कुमार यादव, ३० वर्षीय धर्मनाथ यादव, २८ वर्षीय पप्पु यादव र सोही उमेरका मनोज कुमार यादव रहेका छन्।  नियन्त्रणमा आएका सबै जनाको स्थायी बसोबास वडै नम्बर ९ मा पर्ने बताइएको छ।

अन्दुपट्टी निवासी दुखी यादवको मृत्यु संस्कारपछि १० दिनको भोज ढिला सुरु भएको विषयलाई लिएर स्थानीय दुई समूहबीच विवाद चर्किएको थियो। झगडा तीव्र बन्दै गएपछि सप्तरी जिल्ला प्रहरी कार्यालयमा कार्यरत प्रहरी सहायक हवलदार शम्भु कुमार यादवले कटुवा पेस्तोल प्रयोग गर्दै वडाध्यक्ष यादवको छातीमा गोली हानेको प्रहरीले जनाएको छ।

पक्राउ परेकाहरूको साथबाट एक थान कटुवा पेस्तोल र एक खोका बरामद गरिएको छ। उनैहरूलाई फरक–फरक स्थानबाट नियन्त्रणमा लिएर जिल्ला अदालत धनुषाबाट म्याद थप गराई अनुसन्धान अघि बढाइएको जिल्ला प्रहरी कार्यालयका नायव उपरीक्षक गणेश बहादुर बमले जानकारी दिएका छन् ।