सुरक्षा: काठमाडौं प्रहरीले भन्यो-टिकट बिक्री भइसक्यो,त्रिवि मैदान बाहिर भिड नगर्नू

काठमाडौं । आजदेखि सुरु हुन लागेको सिद्धार्थ बैंक नेपाल प्रिमियर लिग 'एनपिएल'  को पहिलो खेलका सबै टिकट बिक्री भइसकेका कारण सुरक्षाको दृष्टिकोणले त्रिवि क्रिकेट मैदान वरपर अनावश्यक भीड नगर्न काठमाडौं प्रहरीले आग्रह गरेको छ।

आज सोमबार अपराह्न ४ बजे हुने उद्घाटन खेलमा पहिलो संस्करणको विजेता जनकपुर बोल्ट्स र काठमाडौं गोर्खाज आमनेसामने हुँदैछन्। आयोजकले खेलका सबै टिकट पहिले नै बिक्री गरिसकेको जानकारी गराएपछि सुरक्षालाई ध्यानमा राख्दै प्रहरीको यस्तो अनुरोध सार्वजनिक भएको हो।

जिल्ला प्रहरी परिसर काठमाडौंका एसपी पवनकुमार भट्टराईले जारी गरेको सूचनामा टिकट नभएकालाई मैदान क्षेत्रतिर नआउन आग्रह गरिएको छ।

सूचनामा भनिएको छ-"  टिकट नपाएकाहरूले आफूलाई अनुकूल स्थानमै रहेर खेल हेर्न, खेल मैदान वरपर अनावश्यक भीड नगर्न र सुरक्षाको जिम्मेवारी निर्वाह गरिरहेका प्रहरीले सहज ढंगले काम गर्न सहयोग गर्नु सबैको दायित्व हो। प्रहरीले भीड व्यवस्थापनलाई चुनौती नबनाउन सर्वसाधारणसँग सहयोगको अपेक्षा गरेको छ।"