अनलाइन ठगीका घटना बढेपछि प्रहरीले जारी गर्‍यो यस्तो सूचना.......

काठमाडौँ। अनलाइनमार्फत हुने ठगीका घटना निरन्तर बढ्दै गएपछि जिल्ला प्रहरी परिसर काठमाडौँले नागरिकलाई सतर्क रहन आग्रह गर्दै सात बुँदे सार्वजनिक सूचना सार्वजनिक गरेको छ।

परिसरका प्रवक्ता पवनकुमार भट्टराईका अनुसार दैनिकजसो नागरिक प्रलोभनमा परेर आर्थिक ठगीमा पर्ने घटना दर्ता भइरहेको छ। उनले सामाजिक सञ्जाल तथा मेसेजिङ एपहरू—जस्तै फेसबुक, इमो, ह्वाट्सएप, भाइबर र इन्स्टाग्राम—मार्फत ‘चिठ्ठा पर्‍यो’, ‘राजस्व तिर्नुपर्छ’ भन्दै रकम झिकाई ठगी गर्ने प्रवृत्ति बढेकाले यस्ता प्रलोभनबाट जोगिन अनुरोध गरे।

भट्टराईले अपरिचित नम्बर वा व्यक्तिबाट गरिएको भिडियो कल रेकर्ड गरी अश्लील सामग्री बनाएर ‘ब्ल्याकमेल’ गर्ने घटनामा वृद्धि भएको उल्लेख गर्दै यस्तो जोखिमबाट सचेत रहन चेतावनी दिएका छन्।

सार्वजनिक सूचनामा अनलाइनबाट सामान किनमेल गर्दा आधिकारिक तथा विश्वसनीय विक्रेता पहिचान गरी मात्र भुक्तानी गर्न र नगद लेनदेनमा पनि सावधानी अपनाउन सुझाव दिइएको छ। सामाजिक सञ्जालबाट साथी–भाइ वा आफन्तले आर्थिक सहयोग मागेमा प्रत्यक्ष सम्पर्क गरेर मात्र सहयोग प्रदान गर्न आग्रह गरिएको छ, किनकि खाताहरू ह्याक भएको अवस्थामा उनीहरूको नाममा ठगी हुन सक्ने जोखिम रहने प्रहरीले जनाएको छ।

यसबाहेक, सस्तो दर देखाएर अग्रिम रकम मागी ठगी गर्ने घटनाबाट बच्न, अपरिचित लिङ्क नखोल्न, ओटीपी कोड तथा पासवर्ड कसैलाई नदिन, मोबाइलको स्क्रिन अरूलाई नदिइदिन र व्यक्तिगत विवरण सामाजिक सञ्जालमा नराख्न समेत प्रहरीले अनुरोध गरेको छ।