विदेश पठाउने भन्दै लाखौँ रुपैयाँ ठगी गर्ने ४ जना पक्राउ

काठमाडौं। वैदेशिक रोजगारीका नाममा आकर्षक तलबको प्रलोभन देखाई विभिन्न देशमा पठाइदिने भन्दै लाखौँ रुपैयाँ ठगी गर्ने चार जना व्यक्तिलाई प्रहरीले पक्राउ गरेको छ।

पक्राउ परेकामध्ये बुढानिलकण्ठ नगरपालिका–८ बस्ने, खोटाङ ऐसेलुखर्क–८ घर भएका ४१ वर्षीय रमेश कुमार निरौलाले पोल्यान्ड पठाइदिने भन्दै एक पीडितबाट रु ५ लाख ४० हजार उठाएको अनुसन्धानले देखाएको छ।
त्यस्तै, तारकेश्वर नगरपालिका–१० बस्ने, सिन्धुपाल्चोक भोटेकोशी–४ घर भएका ६४ वर्षीय चित्रबहादुर कार्कीले इजरायल पठाइदिने भन्दै एक व्यक्तिबाट रु १३ लाख ठगेका थिए।

यस्तै, काठमाडौं महानगर–२८ बस्ने, महोत्तरी भंगाहा–८ घर भएका २३ वर्षीय हैदर अलीले सर्बिया पठाइदिने बहानामा ६ जनाबाट रु ३२ लाख ५० हजार लिएको र भक्तपुर चाँगुनारायण–८ बस्ने २२ वर्षीय दिनेश पुरीले क्रोएसिया पठाइदिने भन्दै २ जनाबाट रु १२ लाख ४० हजार रकम उठाएर सम्पर्कविहीन बनेको प्रहरीले जनाएको छ।

पीडितहरूले दिएको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको टोलीले रमेश निरौला र दिनेश पुरीलाई बुढानिलकण्ठ–८ बाट, चित्रबहादुर कार्कीलाई तारकेश्वर–१० बाट तथा हैदर अलीलाई काठमाडौं महानगर–१२ बाट पक्राउ गरेको हो।

पक्राउ परेकामध्ये रमेश निरौला र चित्रबहादुर कार्कीलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको छ भने हैदर अली र दिनेश पुरीलाई जिल्ला प्रहरी परिसर काठमाडौंमा राखी थप अनुसन्धान अघि बढाइएको प्रहरीले जनाएको छ।