दाङमा 'ट्राफिक सुरक्षा एजेण्डा' अघि बढ्यो: प्रहरी–व्यवसायीबीच समन्वय र सहकार्यमा जोड

दाङ । समुदाय प्रहरी साझेदारी अवधारणा अनुरुप जिल्ला प्रहरी कार्यालय दाङले यातायात व्यवसायीहरुसँग छलफल तथा अन्तरक्रिया कार्यक्रम सम्पन्न गरेको छ।

दाङ प्रहरी  प्रमुख एसपी दीपक श्रेष्ठको उपस्थितिमा भएको कार्यक्रममा यातायात व्यवसायी, चालक तथा सरोकारवालाको सक्रिय सहभागिता थियो। कार्यक्रममा सवारी दुर्घटना न्यूनीकरण, ट्राफिक नियमको प्रभावकारी पालना, लागुऔषध नियन्त्रण र प्रहरी–यातायात व्यवसायीबीचको समन्वय तथा सहकार्यलाई कसरी थप सुदृढ बनाउन सकिन्छ भन्ने विषयमा विस्तृत छलफल गरिएको थियो।

सहभागीहरूले यातायात क्षेत्रसँग सम्बन्धित विभिन्न चुनौतीहरू खुलेर राखेका थिए। सडकको अवस्था, चालकहरूको नियमित तालिमको कमी, ओभरस्पिड र ओभरलोड जस्ता समस्या, तथा लागुऔषध दुरुपयोगमा केही चालक संलग्न हुनसक्ने जोखिमबारे सुझाव राख्दै सुधारका उपायहरू प्रस्तुत गरे। प्रहरी पक्षले उठेका समस्यामा सहजीकरण, अनुगमन र आवश्यक सहयोगका लागि प्रतिबद्धता जनाएको छ।

यातायात व्यवसायीहरूले सुरक्षित र जिम्मेवार सेवा प्रवाह गर्ने, चालकहरूलाई नियमित रूपमा तालिम तथा सचेतना कार्यक्रममार्फत अभिमुखीकरण गराउने र ट्राफिक नियमलाई कडाईका साथ पालना गर्ने प्रतिबद्धता व्यक्त गरे। कार्यक्रममा भएको खुला संवादले प्रहरी र यातायात व्यवसायीबीचको आपसी विश्वास, समन्वय र सहकार्यलाई थप मजबुत बनाएको सहभागीहरूले प्रतिक्रिया दिएका छन्।

कार्यक्रमले सवारी दुर्घटनाको जोखिम घटाउने, सेवा प्रणालीलाई व्यवस्थित बनाउने र समुदाय–प्रहरी साझेदारीलाई अझ प्रभावकारी बनाउने दिशामा महत्वपूर्ण योगदान पुगेको प्रहरीले जनाएको छ।