किन तानिए बारा र धादिङ प्रहरी प्रमुख?

काठमाडौं । बारामा केही दिनयता बनेको तनावपूर्ण अवस्थाका बीच जिल्ला प्रहरी कार्यालयको नेतृत्व फेरिएको छ। पछिल्लो घटनाक्रममा स्थानीय समूह र सुरक्षाकर्मीबीच भएको झडपपछि प्रहरी मुख्यालयले त्यहाँका प्रहरी प्रमुख एसपी सन्तोष तामाङलाई तत्काल प्रभावबाट फिर्ता बोलाएको हो।

प्रहरीका केन्द्रीय प्रवक्ता डिआइजी अविनारायण काफ्लेका अनुसार तामाङलाई शुक्रबारै कार्य सम्पादनका लागि हेडक्वार्टर तानिएको र त्यसपछि उनलाई मधेस प्रदेश प्रहरी कार्यालयमा पदस्थापन गरिएको छ। उनी नेतृत्वमा रहेको प्रहरी टोली झडप नियन्त्रण तथा अवस्थाको व्यवस्थापनमा प्रभावकारी नदेखिएको भन्दै केन्द्रले हस्तक्षेप गरेको बताइन्छ।

तामाङको स्थानमा मानव बेचबिखन अनुसन्धान ब्युरोमा सेवा दिइरहेका एसपी नरेन्द्र कुँवरलाई नयाँ प्रहरी प्रमुखका रूपमा बारामा पठाएको छ।

यसैबीच, संगठनात्मक स्तरोन्नति र आन्तरिक समायोजनको कारण देखाउँदै धादिङका प्रहरी प्रमुख एसपी भेषराज रिजालको पनि सरुवा गरिएको प्रहरी प्रधान कार्यालयले जनाएको छ। उनको स्थानमा एसपी सुमित खड्कालाई पठाइएको प्रहरी प्रधान कार्यालयले जानकारी दिएको छ। रिजाल ३ महिनामै तानिएका हुन् ।