बर्दियामा प्रहरीको कडा अपरेशन: लागुऔषध नियन्त्रणदेखि शान्ति–सुरक्षा मजबुतीसम्म

सौरभ गिरी । जिल्ला प्रहरी कार्यालय बर्दियाले पछिल्लो समयमा अपराध नियन्त्रण र शान्ति–व्यवस्था मजबुत बनाउन जिल्लाका विभिन्न क्षेत्रमा सशक्त र निरन्तर अपरेशन सञ्चालन गर्दै आएको छ। जिल्ला प्रहरी प्रमुख एसपी सरोज पौडेलको नेतृत्वमा अघि बढाइएका यी अपरेसनहरूले जिल्लामा बढ्दै गएका आपराधिक तथा अवैध गतिविधि नियन्त्रणमा उल्लेखनीय सफलता दिलाएको छ।

लागुऔषध ओसारपसार र दुव्र्यसनविरुद्ध जिल्ला प्रहरी कार्यालय बर्दियाले सुदृढ चेकजाँच, गोप्य सूचना, विशेष गस्ती र अपरेसनमार्फत धेरै जना अभियुक्त पक्राउ गरेको छ भने ठूलो परिमाणमा लागुऔषध बरामद गरेको छ। सीमावर्ती जिल्ला भएकाले जोखिम उच्च रहे पनि प्रहरीले सीमा क्षेत्रमा कडाइ बढाउँदै नियन्त्रण अधिक प्रभावकारी बनाएको छ।

यही अभियानलाई अझ प्रभावकारी बनाउन एक महिना अघि सरुवा भएर आएका इलाका प्रहरी कार्यालय मैनापोखरका इन्स्पेक्टर अच्युत गिरीको सक्रिय पहल र नेतृत्वले पनि ठूलो सहयोग पुर्‍याएको स्थानीबासीहरुको भनाइ छ। उनले आफ्नो क्षेत्रमा लागुऔषध नियन्त्रणलाई विशेष प्राथमिकताका साथ अघि बढाइरहेका छन्।

यसैगरी, जिल्लाभर सञ्चालन गरिएको फरार प्रतिवादी पक्राउ अभियानले पनि ठूलो सफलता हात पारेको छ। विभिन्न मुद्दामा वर्षौँदेखि लुकेर बसेका सयौँ फरार प्रतिवादीहरू पक्राउ परेपछि न्यायिक प्रक्रियामा गतिशीलता आएको छ। प्रहरीका अनुसार, अब कुनै पनि फरार व्यक्तिका लागि बर्दिया सुरक्षित स्थान बन्न नसक्ने वातावरण तयार भएको छ।

बर्दियामा मानव बेचबिखन रोकथामलाई लक्षित गर्दै प्रहरीले जोखिमयुक्त क्षेत्र, सीमाक्षेत्र, बस्ती र विद्यालयमा जनचेतनामूलक कार्यक्रम, अन्तरक्रिया, सूचना संकलन र विशेष गस्तीमार्फत कडा निगरानी गरिरहेको छ। पछिल्ला दिनमा मानव बेचबिखनका घटनामा कमी आएको प्रहरीको मूल्यांकन छ।

यता, अवैध उत्खनन नियन्त्रणमा प्रहरीले स्थानीय तहसँगको समन्वयमा कडा कारबाही गर्दै आएको छ। अवैध उत्खननमा संलग्न डोजर, ट्रिपर र व्यक्तिमाथि कानूनी कारबाही गरिँदै आएको छ, जसले वातावरण तथा प्राकृतिक स्रोत संरक्षणमा सकारात्मक प्रभाव पारेको छ।

त्यसबाहेक, बर्दिया प्रहरीले अवैध तस्करीविरुद्धको अपरेसन थप कडा पार्दै लाखौँ रुपैयाँ बराबरका अवैध सामानहरू बरामद गरेको छ। सीमाबाट भित्रिने इलेक्ट्रोनिक सामान, उपभोग्य सामग्री, कपडा, वन्यजन्तुजन्य वस्तु लगायत विभिन्न गैरकानुनी सामग्रीसहित तस्करहरू पक्राउ गरिएका छन्। प्रहरीका अनुसार तस्करी गर्ने समूहमाथि निगरानी अझ व्यापक रूपमा बढाइएको छ।

जिल्लाका विभिन्न स्थानमा फैलिँदै गएका अनैतिक तथा समाजविरोधी क्रियाकलाप नियन्त्रणका लागि पनि प्रहरीले कडा निगरानी र कारबाही गर्दै आएको छ। होटल–लजमा हुने अनैतिक गतिविधि, जुवातास, अवैध मदिरा, बालबालिकामाथिको दुव्र्यवहार, सार्वजनिक स्थानमा हुने विकृति–विसंगतिमा संलग्न व्यक्तिमाथि लगातार कारबाही भइरहेको छ। यसले सामाजिक अनुशासन र मर्यादा मजबुत बनाएको स्थानीयवासीले बताएका छन्।

राजमार्ग सुरक्षालाई प्राथमिकतामा राख्दै प्रहरीले चालकको मदिरा परीक्षण, ओभरस्पिड, ओभरलोड तथा नियमविपरीत सवारी सञ्चालनमाथि दैनिक जाँच–निरीक्षण गर्दै आएको छ। यसले दुर्घटना घट्न सहयोग पुगेको छ।

समग्रमा, प्रहरी प्रमुख एसपी पौडेलको नेतृत्वमा बर्दिया प्रहरीले सञ्चालन गरिरहेका यी बहुआयामिक अभियानहरूले जिल्लामा शान्ति–सुरक्षा मजबुत बनाउँदै अपराध नियन्त्रण, तस्करी रोकथाम, समाजिक अनुशासन, प्राकृतिक स्रोत संरक्षण र सर्वसाधारणको सुरक्षित वातावरण निर्माणमा महत्वपूर्ण उपलब्धि हासिल गरिरहेको देखिएको छ।