एक हप्तामै कैलाली प्रहरीको नियन्त्रणमा आए १४९ फरार प्रतिवादी

कैलाली। फरार प्रतिवादीहरूलाई नियन्त्रणमा लिन जिल्ला प्रहरी कार्यालय कैलालीले सञ्चालन गरेको विशेष ‘स्वीप अप’ अभियान अन्तर्गत एक हप्तामै १४९ जना पक्राउ परेका छन्।

मंसिर १ देखि ७ गतेसम्म जिल्लाभित्रका विभिन्न स्थानमा खटिएको प्रहरी टोलीले धेरै समयदेखि अदालतको फैसला कार्यान्वयनबाट उम्किरहेकाहरुलाई पक्राउ गर्न सफल भएको हो।

जिल्ला प्रहरी कार्यालयका प्रवक्ता प्रहरी नायब उपरीक्षक राजकुमार सिंहका अनुसार जिल्ला अदालत कैलालीले कैद तथा जरिवाना तिर्न बाँकी रहेका प्रतिवादीहरूलाई फरार सूचीमा राख्दै आएको थियो। यही सूचीका आधारमा प्रहरीले खोजी तिव्र बनाउँदै कारबाही अघि बढाएको उनले बताए।

उनका अनुसार पक्राउ परेका सबैलाई आवश्यक कानुनी प्रकृयाका लागि जिल्ला अदालतमै बुझाइएको छ। सिंहले फरारप्रतिवादीहरूमाथि आइन्दा पनि कडा निगरानी र निरन्तर अभियान सञ्चालन गरिने स्पष्ट पारे।