महम्मदपुरबाट ब्राउन सुगरसहित २१ वर्षीय युवक बर्दिया प्रहरीको नियन्त्रणमा

गुलरिया । बर्दियाको गुलरिया नगरपालिका–११ गणेशपुर बाईपास क्षेत्रबाट ब्राउन सुगरसहित एक युवक पक्राउ परेका छन्।

प्रहरी चौकी महम्मदपुरबाट खटिएको टोलीले शंकास्पद रूपमा पैदल हिँडिरहेका तुलसीपुर  बस्ने २१ वर्षीय दिपक थापा क्षेत्रीलाई जाँच गर्ने क्रममा प्लाष्टिकमा लुकाइ–छिपाइ राखिएको ब्राउन सुगर फेला पारेको  बर्दिया प्रहरीले जनाएको छ।

जिल्ला प्रहरी कार्यालय बर्दियाका अनुसार बरामद गरिएको पदार्थको प्रारम्भिक तौल ५०० मिलिग्राम रहेकामा प्लास्टिक खोलेर शुद्ध तौल गर्दा ३७० मिलिग्राम  ब्राउनसुगर भेटिएको हो।

सोमबार साँझ पक्राउ परेका थापा क्षेत्रीलाई आवश्यक कारबाहीका लागि नियन्त्रणमा लिएर बर्दिया अदालतबाट म्याद थप गरेर अनुसन्धान अघि बढाइएको जिल्ला प्रहरी कार्यालय बर्दियाले जनाएको छ।