ब्राउन सुगरसहित ३ जना दाङ प्रहरीको नियन्त्रणमा

दाङ । दाङमा ब्राउन सुगरसहित तीन जना पक्राउ परेका छन्।तुलसीपुर उपमहानगरपालिका–७ राजापुरमा बस्दै आएका ३० वर्षीय कुमार नेपाली र २३ वर्षीय विजय अधिकारीलाई प्रहरीले पक्राउ गरेको हो।

उनीहरुको साथबाट १ ग्राम ९४० मिलिग्राम ब्राउन सुगर बरामद भएको जिल्ला प्रहरी कार्यालयले जनाएको छ। पक्राउ परेका दुबैजनालाई जिल्ला अदालतले पाँच दिन थुनामा राखी अनुसन्धान गर्न अनुमति जिल्ला प्रहरी कार्यालय बाँकेले जानकारी दिएको छ।

त्यसैगरी, घोराही उपमहानगरपालिका–१३ बाट ३४ वर्षीय कर्णबहादुर बिक पनि ८०० मिलिग्राम ब्राउन सुगरसहित पक्राउ परेका छन्। उनी वनगाउँमा सञ्चालन गर्दै आएको बंगुर फर्ममा बसिरहेका बेला पक्राउ परेका हुन्। प्रहरीले सूचना पाएर अनुसन्धान गर्दा बिकले सो स्थानबाट ब्राउन सुगरको कारोबार गर्दै आएको पत्ता लगाएको थियो।

बिक रोल्पा जिल्लाको माडी गाउँपालिका–२ का स्थायी बासिन्दा हुन्। उनलाई पनि अदालतले पाँच दिन थुनामा राखेर अनुसन्धान गर्न अनुमति दिएको छ।