नेपालगन्जको गोदाममा प्रहरीको छापा:२० लाखको अवैध केराउ बरामद,सन्चालक पक्राउ

बाँके । बाँकेको नेपालगन्ज बजारबाट प्रहरीले अवैध रूपमा भण्डारण गरिएको २० लाख रुपैयाँभन्दा बढीको मटर (केराउ) बरामद गरेको छ। जिल्ला प्रहरी कार्यालय बाँकेले नेपालगन्ज उपमहानगरपालिका–१ गुलरिया बसपार्क नजिक सञ्चालित मुस्कान ट्रेडर्समा छापा मार्दै ११ सय ३० बोरा केराउ बरामद गर्दै सञ्चालक मुबारक अहमद कबडियालाई नियन्त्रणमा लिएको हो।

प्रहरीका अनुसार भारतबाट अवैध रुपले भन्सार छली गरी ल्याइएएको ३३ हजार ९ सय किलो केराउ गोदाममा अवैध रूपमा भण्डारण गरिएको पुष्टि भएपछि छापा हानिएको त्जियो। बरामद गरिएको केराउको मूल्य करिब २० लाख ३४ हजार रुपैयाँ रहेको जिल्ला प्रहरी कार्यालय बाँकेले जानकारी दिएको छ।

बिहीबार साँझ बरामद गरिएको सो अवैध केराउ तथा पक्राउ परेका सञ्चालकलाई आज आवश्यक कारबाहीका लागि नेपालगन्ज भन्सार कार्यालयमा बुझाइएको जिल्ला प्रहरी कार्यालय बाँकेले जनाएको छ।

बाँके प्रहरी प्रमुख एसपी अंगुर जिसीले कमाण्ड सम्हालेयता अवैध ओसारपसार तथा तस्करीविरुद्ध कडाइका साथ अभियान चलाउँदै आएका छन्। उनको नेतृत्वमा पछिल्ला दिनमा लाखौं रुपैयाँ बराबरका अवैध सामानहरू लगातार बरामद हुँदै आएका छन्।