तुलसीपुरमा बोल्न नसक्ने ५६ वर्षीया महिलामाथि बलात्कार, छिमेकी पक्राउ

दाङ । दाङको तुलसीपुर उपमहानगरपालिका-१६ मा बोल्न नसक्ने ५६ वर्षीया महिलामाथि यौन हिंसा (बलात्कार ) भएको आरोपमा एक छिमेकी पक्राउ परेका छन्। किटानी जाहेरीका आधारमा ६० वर्षीय रुपलाल डाँगीलाई प्रहरीले नियन्त्रणमा लिएको हो।

जाहेरी अनुसार मंसिर १६ गते बिहान करिब साढे ५ बजेतिर घटना भएको उल्लेख छ। मंसिर २१ गते पीडित महिलाका श्रीमान इलाका प्रहरी कार्यालय तुलसीपुर पुगेर किटानी जाहेरी दिएपछि प्रहरीले सोही दिन राति डाँगीलाई घरमै पुगेर नियन्त्रणमा लिएको हो।

जाहेरीमा उल्लेख भएअनुसार पीडितका श्रीमान बिहानै ज्याला मजदुरीका लागि घरबाट निस्किएको मौका छोपी डाँगी सुतिरहेकी महिलामाथि बलात्कार  गरेको आरोप छ। घटना घट्ने क्रममै महिलाको छोरा कोठामा पुगेपछि डाँगी भागेको पनि उल्लेख गरिएको छ।

इलाका प्रहरी कार्यालय तुलसीपुरका प्रहरी निरीक्षक बिनोदराज खत्रीका अनुसार महिलामाथि यौन हिंसा भइरहेको दृश्य छोरा आफैले प्रत्यक्ष देखेका कारण आरोपीलाई पक्राउ गरिएको हो। पीडित महिलाको स्वास्थ्य परीक्षण तुलसीपुरस्थित राप्ती प्रादेशिक अस्पतालमा गरिएको छ। परीक्षन रिपोर्ट आइरहेको प्रहरीले जनाएको छ। घटनाबारे थप अनुसन्धान भइरहेको प्रहरीले बताएको छ।

पक्राउ परेका डाँगीविरुद्ध सोमबार दाङ जिल्ला अदालतबाट म्याद थप गरेर इलाका प्रहरी कार्यालय तुलसीपुरले थप अनुसन्धान अगाडि बढाएको जनाएको छ।