प्रहरीका डीएसपी मधु नेपाल पक्राउ,३ दिनको म्याद थप

बुटवल । बहुविवाहको आरोपमा नेपाल प्रहरीले आफ्नै अधिकृत, डीएसपी मधु नेपाललाई पक्राउ गरेको छ। नवलपरासी पूर्वमा कार्यरत डीएसपी नेपाललाई उनकी पहिलो श्रीमतीले दिएको उजुरीका आधारमा प्रहरीले नियन्त्रणमा लिएको हो।

जिल्ला प्रहरी कार्यालय रुपन्देहीबाट अदालतको अनुमति लिएर पक्राउ पुर्जी जारी गरिएको र त्यसअनुसार नेपाललाई हिरासतमा लिइएको प्रहरी प्रमुख एसपी प्रदीपबहादुर क्षेत्रीले जानकारी दिए।

उनका अनुसार डीएसपी नेपाल सोमबार साँझ स्वयं प्रहरी कार्यालयमा हाजिर भएका थिए। “मुद्दा दर्ता भएपछि उहाँ आफैं उपस्थित हुनुभएको थियो। आवश्यक प्रक्रिया पूरा गरी तीन दिनको म्याद थपेर अनुसन्धान थालिएको छ,” एसपी क्षेत्रीले भने।

प्रहरीले बहुविवाहसम्बन्धी प्रमाण संकलनका साथै नेपालकी भनिएकी दोस्रो श्रीमतीको खोजी कार्य पनि अघि बढाएको जनाएको छ।