कोहलपुरको रझेनाबाट ब्राउन सुगरसहित दुईजना प्रहरीको नियन्त्रणमा

कोहलपुर । बाँकेको कोहलपुरबाट ब्राउन सुगरसहित प्रहरीले दुई जनालाई पक्राउ गरेको छ।

इलाका प्रहरी कार्यालय कोहलपुरबाट खटिएको टोलीले कोहलपुर नगरपालिका-६ रझेनाबाट ब्राउन सुगरसहित २१ वर्षीय रोहित थारू र अर्का एक जनालाई पक्राउ गरेको जिल्ला प्रहरी कार्यालय बाँकेले जानकारी दिएको छ।

कोहलपुर प्रहरीले उनीहरूको साथबाट ५ सय ६० मिलिग्राम ब्राउनसुगर ,१ थान डिजिटल तराजु र नगद २२ हजार २ सय २५ रुपैयाँ बरामद गरेको बाँके प्रहरीले जनाएको छ। साथै उनीहरूले प्रयोग गरेको लु.प्र.०३–००१ प ३५६९ नम्बरको मोटरसाइकल पनि प्रहरीले नियन्त्रणमा लिएको हो।

शुक्रबार दिउँसो पक्राउ परेका उनीहरुविरुद्ध इलाका प्रहरी कार्यालय कोहलपुरले लागुऔषध कसुरमा थप अनुसन्धान अगाडि बढाएको जिल्ला प्रहरी कार्यालय बाँकेले जानकारी दिएको छ।