प्रहरी-प्रशासनसँग पहुँचको दाबी गर्दै रकम असुली, दुई जना प्रहरीको नियन्त्रणमा

कपिलवस्तु । मुद्दा मिलाइदिने भन्दै पीडित पक्षसँग रकम असुली गरेको आरोपमा दुई जनालाई प्रहरीले नियन्त्रणमा लिएको छ। पक्राउ  पर्नेमा कपिलवस्तुको बुद्धभूमि नगरपालिका–१० बिजगौली निवासी ५० वर्षीय अयोध्यालाल श्रीवास्तव र सोही ठाउँका २२ वर्षीय भगत भन्ने मोहन रैदास रहेको जिल्ला प्रहरी कार्यालय कपिलवस्तुले जानकारी दिएको छ।

कपिलवस्तु प्रहरीका अनुसार मंसिर १२ गते राति कपिलवस्तु नगरपालिका–३ विशम्भरपुरमा झैझगडा भई कुटपिट तथा ज्यान मार्ने उद्योग सम्बन्धी मुद्दा दर्ता भएको थियो। लक्ष्मण केवटको जाहेरीका आधारमा नेपाल सरकार वादी र प्रलाहद केवटसहित तीन जना प्रतिवादी बनाई मुद्दा दर्ता भई अनुसन्धान भइरहेको अवस्थामा आरोपित दुवैले आफूहरूको प्रहरी, प्रशासन तथा ठूला व्यक्तिसँग राम्रो चिनजान रहेको भन्दै मुद्दा दर्ता हुन नदिने र मिलाइदिने प्रलोभन देखाएका थिए।

सोही क्रममा मंसिर १३ गते दिउँसो १ बजे कपिलवस्तु नगरपालिका–२ स्थित सरिमा अस्पताल अगाडि रहेको पान पसल नजिकबाट हिरासतमा रहेका प्रलाहद केवटकी श्रीमती मिना केवटसँग १० हजार रुपैयाँ लिई ठगी गरेको उजुरी मंसिर २७ गते प्रहरी कार्यालयमा परेको कपिलबस्तु प्रहरीले जानकारी दिएको छ।

उजुरीका आधारमा प्रहरीले दुवै जनालाई नियन्त्रणमा लिई मंसिर २८ गते कपिलवस्तु जिल्ला अदालतबाट ठगी तथा आपराधिक लाभ (एक्सटर्सन) कसुर शिर्षकमा पाँच दिनको म्याद थप गरी थप अनुसन्धान गरिरहेको कपिलवस्तु प्रहरीले जनाएको छ।

यता, प्रहरीले मुद्दा मिलाइदिने, प्रशासनिक पहुँचको दाबी गर्दै आर्थिक लेनदेन गर्ने जस्ता प्रलोभनमा नपर्न सर्वसाधारणलाई आग्रह गरेको छ। यस्ता कार्यमा संलग्न पाइएमा प्रचलित कानून बमोजिम कडा कारबाही गरिने प्रहरीले चेतावनी दिएको छ।