झुटा विवरण राखेर नागरिकता तथा राहदानी बनाउने गिरोहका तुलसीपुरका बस्नेतसहित ३ जना पक्राउ

काठमाडौँ। झुटा विवरण प्रयोग गरी नागरिकता, राष्ट्रिय परिचयपत्र तथा राहदानी बनाउने गिरोहमा संलग्न रहेको आरोपमा  तीन जनालाई प्रहरीले पक्राउ  गरेको छ। उपत्यका अपराध अनुसन्धान कार्यालयको टोलीले उनीहरू तीन जनालाई पक्राउ गरी सार्वजनिक गरेको हो।

पक्राउ पर्नेहरूमा दाङको तुलसीपुर उपमहानगरपालिका–१७ स्थायी घर भई हाल काठमाडौँ तारकेश्वर–८ शान्तिटोल बस्दै आएका ४३ वर्षीय यमबहादुर बस्नेत, झापाको कचनकबल गाउँपालिका–३ घर भई हाल ललितपुर महालक्ष्मी–१ इमाडोलमा बसोबास गर्ने ५१ वर्षीय कृष्णबहादुर कटुवाल तथा झापाकै भद्रपुर नगरपालिका–९ घर भई हाल काठमाडौँ महानगरपालिका–३० ज्ञानेश्वर बस्ने ४१ वर्षीय सूर्यबहादुर खड्का रहेका छन्।

उपत्यका अपराध अनुसन्धान कार्यालयका प्रवक्ता एवं प्रहरी उपरीक्षक काजीकुमार आचार्यका अनुसार उनीहरू विरुद्ध नागरिकता कीर्ते, लिखत कीर्ते तथा सङ्गठित अपराधसम्बन्धी कसुरमा अनुसन्धान भइरहेको छ।

आवश्यक थप अनुसन्धान र कानुनी कारबाहीका लागि पक्राउ परेका उनीहरुलाई जिल्ला प्रहरी कार्यालय झापामा पठाइएको अपराध अनुसन्धान कार्यालयले जनाएको छ।