डीएसपी केसीको सफल कमाण्ड:३३ नाल बन्दुक बरामदसँगै ८४ फरार र १५ लागुऔषध कारोबारी पक्राउ

काठमाडौं । जिल्ला प्रहरी कार्यालय सल्यानले मंसिर महिनाभर जिल्लामा शान्ति सुरक्षा कायम गर्न उल्लेखनीय सफलता हासिल गरेको जनाएको छ। डीएसपी डा. हेमबहादुर केसीको कमाण्डको सल्यान प्रहरीले कानुनविपरीतका गतिविधिप्रति कुनै सहनशीलता नदेखाउने नीति अवलम्बन गर्दै व्यापक कारबाही गरेको हो।

जिल्ला प्रहरी कार्यालय सल्यानले जानकारी दिएअनुसार समाजका नकारात्मक तत्त्वमध्ये लागुऔषध कारोबारलाई निस्तेज पार्ने अभियानलाई प्राथमिकतामा राखेर प्रहरीले निरन्तर निगरानी र कारबाही तीव्र बनाएको छ। जस अन्तर्गत लागुऔषधसहित १५ कारोबारीलाई पक्राउ गर्न सल्यान प्रहरी सफल भएको छ।

त्यसैगरी, प्रहरीका अनुसार मंसिर महिनामा अवैध रूपमा राखिएका ३३ नाल भरुवा बन्दुक बरामद गरिएको छ भने चोरीका सवारी साधनहरू समेत फेला पारिएको छ। कागजातविहीन ६ वटा जीपलाई नियन्त्रणमा लिएर कारबाहीका लागि राजश्व कार्यालय कोहलपुर, बाँके पठाइएको जिल्ला प्रहरी कार्यालय सल्यानले जनाएको छ।

सो अवधिमा १२ वटा मोटरसाइकल नियन्त्रणमा लिंदा  जबरजस्ती करणी सम्बन्धी घटनामा ३ जना पक्राउ परेका छन्। विभिन्न मुद्दामा फरार रहेका प्रतिवादीतर्फ ८४ जनालाई पक्राउ गरिएको जिल्ला प्रहरी कार्यालय सल्यानले जानकारी दिएको छ।

अवैध रूपमा संकलन गरिएको २५० क्यूवायर फिट काठ बरामद गरिएको छ भने  अवैध उत्खनन् कार्यमा संलग्न जेसीबी, स्काभेटर, ट्र्याक्टर र टिप्पर गरी जम्मा ३५ वटा सवारी साधनमाथि कारबाही गरिएको प्रहरीले जनाएको छ। यस्तै, रातो नम्बर प्लेटका २५० वटा सवारी साधनलाई कारबाही गरिएको हो।

कारबाहीका क्रममा १३ लाख ५२ हजार रुपैयाँ राजश्व संकलन भएको जिल्ला प्रहरी कार्यालय सल्यानले जनाएको छ।

सल्यान प्रहरीले कारबाहीसँगै सचेतनात्मक कार्यक्रमलाई पनि निरन्तरता दिएको जनाएको छ। मंसिर महिनामा लागुऔषध सम्बन्धी २० पटक जनचेतना कार्यक्रम, महिला हिंसा सम्बन्धी २५ पटक जनचेतना, तथा ५ पटक नागरिक सुनुवाइ कार्यक्रम सम्पन्न गरिएको छ।

जिल्ला प्रहरी कार्यालय सल्यानले हाल जिल्लामा कानुनविपरीत कार्य गर्नेहरूमाथि कडा निगरानी राखिएको र शान्ति सुरक्षा कायम राख्न प्रहरी सक्रिय रूपमा परिचालित रहेको जनाएको छ।