एम्बुलेन्सबाट गाँजा तस्करी गर्ने समूहमाथि प्रहरी गर्‍यो हवाई फायर,४८० किलोसहित २ जना पक्राउ

काठमाडौं । प्रहरीले गाँजा तस्करीमा संलग्न समूहलाई नियन्त्रणमा लिन फेरि हवाई फायर गरेको छ। प्रहरीले  केराबारी गाउँपालिका–५ लाफा टोलमा आइतबार राति करिब साढे ११ बजे  एम्बुलेन्स प्रयोग गरी ओसारिँदै गरेको गाँजा बरामद गर्दै हवाई फायर गरेर दुई जनालाई पक्राउ गरेको हो।

मोरङ प्रहरीका अनुसार धनकुटाबाट मोरङतर्फ आउँदै गरेको प्रदेश १–०६–००१ झ ०००४ नम्बरको एम्बुलेन्सलाई जाँचका लागि रोक्न खोज्दा चालक र एम्बुलेन्समा सवार व्यक्ति भाग्न खोजेका थिए। त्यसक्रममा प्रहरीले पेस्तोलबाट एक राउण्ड हवाई फायर गरेको थियो।

भाग्ने प्रयास गर्ने धनकुटाको सहिदभूमि गाउँपालिका–६ का ३५ वर्षीय निश्चल राई र साँगुरीगढी गाउँपालिका–२ का २० वर्षीय खगेन्द्र लिम्बूलाई नियन्त्रणमा लिइएको मोरङ प्रहरी प्रमुख प्रहरी उपरीक्षक कवित कटवालले जानकारी दिए। एम्बुलेन्सबाट करिब ४८० किलो गाँजा बरामद गरिएको प्रहरीले जनाएको छ।

यसअघि शनिबार राति पनि मोरङकै जहदा गाउँपालिका–२ तारिगामामा प्रहरीले एक राउण्ड हवाई फायर गरी गाँजा ओसारपसारमा संलग्न दुई जना भारतीय नागरिकलाई पक्राउ गरेको थियो। सो घटनामा ३३० किलो गाँजासहित २४ वर्षीय अबुल हसन र ३० वर्षीय सोहेल खान पक्राउ परेका थिए।

प्रहरीले पछिल्लो समय मोरङ–भारत सीमा क्षेत्र आसपास गाँजा तस्करी नियन्त्रणका लागि निगरानी र कारबाही तीव्र बनाएको जनाएको छ।