लुटपाटको योजनामा ३ जनाको श्रृंखलाबद्ध हत्या, चार जनाको गिरोह पक्राउ

काठमाडौं । ओखलढुङ्गामा लुटपाट गर्ने योजनासहित भएका दुई छुट्टाछुट्टै घटनामा तीन जनाको निर्मम हत्या गरेको आरोपमा चार जनाको समूहलाई प्रहरीले नियन्त्रणमा लिएको छ। नेपाल प्रहरीको केन्द्रीय अनुसन्धान ब्युरो (सीआईबी), कोशी प्रदेश प्रहरी र जिल्ला प्रहरी कार्यालय ओखलढुङ्गाको संयुक्त टोलीले उनीहरूलाई पक्राउ गरी आइतबार सार्वजनिक गरेको हो।

कोशी प्रदेश प्रहरी कार्यालय विराटनगरका एसएसपी दीपक पोखरेलका अनुसार पक्राउ पर्नेहरूमा चिशंखुगढी गाउँपालिका क्षेत्रका संगम राई, विनोद राई, प्रकाश भुजेल र अशोक भुजेल रहेका छन्। उनीहरूमाथि गत असोज महिनामा रत्नकुमारी कटवालको हत्या गरेको आरोप छ।

प्रहरीका अनुसार त्यसको करिब तीन महिनापछि पुस १५ गते चिशंखुगढी गाउँपालिका–६ मा ६० वर्षे दम्पती शोभितमान थापामगर र रत्नमाया थापामगरको समेत हत्या गरिएको थियो। एकान्त स्थानमा रहेको घरमा कोदालो प्रहार गरी दम्पतीको ज्यान लिएको अनुसन्धानबाट खुलेको प्रहरीले जनाएको छ।

प्रारम्भिक अनुसन्धानमा उक्त समूहले एक्लै बस्ने तथा नगद र सुनचाँदी भएको अनुमान गरिएका व्यक्तिहरूलाई निशाना बनाएर अत्यन्त क्रूर तरिकाले हत्या गरी लुटपाट गर्ने गरेको पाइएको छ। उनीहरूको साथबाट हत्या प्रयोजनमा प्रयोग गरिएका बन्चरो र खुकुरी, लुटिएको सुन पगालेर बनाइएको औँठी, रिचार्ज कार्ड, दुई नाल भरुवा बन्दुक र मोबाइल फोनहरू बरामद गरिएको प्रहरीले जनाएको छ।

पक्राउ परेकाविरुद्ध कर्तव्य ज्यान, डाँका तथा हातहतियार खरखजना सम्बन्धी कसुरमा मुद्दा दर्ता गरी अदालतबाट म्याद थप गरेर थप अनुसन्धान भइरहेको प्रहरीले जानकारी दिएको छ।