१६ वर्षीया किशोरीलाई बन्धक बनाएर यौनधन्दामा लगाएको आरोपमा गजल सञ्चालकसहित दुई पक्राउ

काठमाडौं  । प्रहरीले गजलमा कार्यरत एक १६ वर्षीया किशोरीलाई बन्धक बनाएर यौनधन्दामा संलग्न गराएको आरोपमा दुई जनालाई पक्राउ गरेको छ।

मोरङकोविराटनगर महानगरपालिका–११ रोडशेषमा सञ्चालन हुँदै आएको ‘भिन्तुना गीत गजल’मा कार्यरत ती किशोरीलाई बन्धक बनाएर यौनधन्दामा संलग्न गराएको आरोपमा प्रहरीले सञ्चालकसहित दुई जनालाई पक्राउ गरेको मोरङ प्रहरीले जानकारी दिएको छ।

प्रहरीका अनुसार गजलमा काम गर्ने किशोरीलाई भारतीय नागरिकहरूसँग जबर्जस्ती यौनसम्पर्क गर्न बाध्य पारिएको तथा शारीरिक यातना दिने गरिएको उजुरी परेपछि अनुसन्धान थालिएको हो। झापा कनकाई नगरपालिका–१ घर भएकी ती किशोरी करिब पाँच महिनादेखि उक्त गजलमा काम गर्दै आएकी थिइन्।

प्रारम्भिक अनुसन्धानमा गजल सञ्चालक र त्यहाँ कार्यरत अर्का व्यक्तिले मिलेर किशोरीलाई कोठामा थुनेर राख्ने, कुटपिट गर्ने र भारतीय ग्राहकसँग यौनसम्पर्क गराउन दबाब दिने गरेको खुलेको प्रहरीले जनाएको छ।

गोप्य सूचनाका आधारमा खटिएको प्रहरी टोलीले घटनास्थलबाट किशोरीको उद्धार गरेको थियो। पीडितको जाहेरीपछि जिल्ला प्रहरी कार्यालय मोरङले सोमबार गजल सञ्चालक विराटनगर–१२ का ३३ वर्षीय पर्शुराम कामत र गजलमै काम गर्ने विराटनगर–८ का २६ वर्षीय मनिष ठाकुरलाई पक्राउ गरेको हो।

पक्राउ परेका दुवै जनामाथि मानव बेचबिखन तथा शरीर बन्धकसम्बन्धी कसुरमा म्याद थप गरी अनुसन्धान अघि बढाइएको मोरङ प्रहरीकी प्रवक्ता डीएसपी कोपिला चुडालले जानकारी दिएकी छन्।