लागुऔषधसहित एघार जना नेपाल प्रहरीको नियन्त्रणमा

काठमाडौं । प्रहरीले देशका विभिन्न स्थानबाट ठूलो परिमाणमा विभिन्न प्रकारका लागुऔषधसहित ११ जनालाई पक्राउ गरेको छ।

प्रहरी प्रधान कार्यालयका अनुसार सप्तरीको राजगढ गाउँपालिका–५ धनकी टोलबाट करिब २५ किलो ५ सय ग्राम गाँजासहित राजगढ गाउँपालिका–४ का ४० वर्षीय देबेन्द्र मण्डललाई पक्राउ गरिएको हो। जिल्ला प्रहरी कार्यालय सप्तरीबाट खटिएको प्रहरीले स.९ प ७७९४ नम्बरको मोटरसाइकलमा सवार मण्डललाई गाँजासहित नियन्त्रणमा लिएको हो।

मोरङको विराटनगर महानगरपालिका–१६ बाट १ ग्राम २० मिलिग्राम खैरो हेरोइनसहित विराटनगर–१ भट्टा चोकका २३ वर्षीय रिहान अन्सारी पक्राउ परेका छन्। इलाका प्रहरी कार्यालय रानीबाट खटिएको प्रहरीले भारतबाट नेपालतर्फ पैदल आउँदै गरेका अन्सारीलाई नियन्त्रणमा लिएको हो।

कञ्चनपुरको बेलौरी नगरपालिका–८ बुढिया घाँटबाट ८ सय १० मिलिग्राम खैरो हेरोइनसहित तीन जना पक्राउ परेका छन्। पक्राउ पर्नेमा कैलालीको गोदावरी नगरपालिका–१ विजयनगरका २२ वर्षीय पारस पार्की, २८ वर्षीय केशव कुञ्जेडा र २५ वर्षीय रोहित कामी रहेका छन्। प्रहरी चौकी पचुएइबाट खटिएको टोलीले उनीहरूलाई पक्राउ गरेको हो।

कैलालीको धनगढी उपमहानगरपालिका–१ बसन्तटोलबाट ४ सय १० मिलिग्राम ब्राउनसुगरसहित सोही ठाउँका १८ वर्षीय किशोरलाई प्रहरीले पक्राउ गरेको छ।

रूपन्देहीको सैनामैना नगरपालिका–२ बनदेवीबाट करिब ४ ग्राम ४ सय ९० मिलिग्राम ब्राउनसुगरसहित तीन जना पक्राउ परेका छन्। पक्राउ पर्नेमा २७ वर्षीय विशाल मल्ल ठकुरी, २३ वर्षीय मन्जिल बराल मगर र २० वर्षीय अस्मिन राना मगर रहेका छन्। इलाका प्रहरी कार्यालय रन्यौराबाट खटिएको टोलीले उनीहरूलाई नियन्त्रणमा लिएको हो।

भोजपुरको आमचोक गाउँपालिका–१० बाट करिब ८७ किलो ५ सय ग्राम गाँजासहित भोजपुर नगरपालिका–५ बोखिमका ४६ वर्षीय मनिचन्द्र राई पक्राउ परेका छन्। इलाका प्रहरी कार्यालय बालंखाबाट खटिएको प्रहरीले उनलाई नियन्त्रणमा लिएको जनाएको छ।

त्यसैगरी, ललितपुरको महालक्ष्मी नगरपालिका–३ इमाडोल अमन टोलमा डेरा गरी बस्दै आएका भारतको सितामाडी घर भएका २३ वर्षीय मनोज कुमारलाई करिब ८ ग्राम ४ सय ८० मिलिग्राम ब्राउनसुगरसहित पक्राउ गरिएको छ। प्रहरी वृत्त सातदोबाटोबाट खटिएको टोलीले कोठा तलासीका क्रममा उनलाई नियन्त्रणमा लिएको हो।

पक्राउ परेकाहरुविरुद्द सम्बन्धित प्रहरी कार्यालयले  थप आवश्यक अनुसन्धान गरिरहेको प्रहरी प्रधान कार्यालयले जनाएको छ।