देशभरबाट २२ सय ९६ फरार प्रतिवादी पक्राउ, १८ करोड ९० लाख रुपैयाँबढी जरिवाना असुलउपर

काठमाडौं । नेपाल प्रहरीले गत पुस महिनाभर देशभर सञ्चालन गरेको फैसला कार्यान्वयन अभियानअन्तर्गत २ हजार २ सय ९६ जना फरार प्रतिवादीलाई पक्राउ गरेको छ । 

प्रहरी प्रधान कार्यालयका अनुसार पक्राउ परेका प्रतिवादीहरूबाट अदालतले तोकेको १८ करोड २० लाख २२ हजार ८६६ रुपैयाँ जरिवाना असुलउपर गरिएको छ। पक्राउ परेका उनीहरुलाई  ९१४ वर्ष ५ महिना ४ दिन कैद तोकिएको थियो।

प्रदेशगत विवरणअनुसार लुम्बिनी प्रदेशबाट २ सय ५७ जना पक्राउ परेका छन् भने बागमती प्रदेशबाट ३ सय ८६ जना र कोशी प्रदेशबाट ३ सय ९६ जना फरार प्रतिवादी नियन्त्रणमा लिइएका छन् । त्यसैगरी मधेश प्रदेशबाट ४ सय ५३ जना, गण्डकी प्रदेशबाट १४४ जना, सुदूरपश्चिम प्रदेशबाट ३४४ जना, कर्णाली प्रदेशबाट ४४ जना पक्राउ परेका छन् ।

केन्द्रीय अनुसन्धान ब्यूरो (सीआईबी) मार्फत ३ जना प्रतिवादी पक्राउ पर्दा ३ करोड ४६ लाख रुपैयाँभन्दा बढी जरिवाना असुल गरिएको छ भने काठमाडौं उपत्यकाबाट २६९ जना पक्राउ भई ३ करोड ५१ लाख २८ हजार ६०७ रुपैयाँ संकलन भएको प्रहरी प्रधान कार्यालयले जानकारी दिएको छ।

नेपाल प्रहरीले अदालती फैसला कार्यान्वयनलाई प्रभावकारी बनाउन नियमित रूपमा यस्ता अभियान सञ्चालन गर्दै आएको जनाएको छ । फरार प्रतिवादी पक्राउ अभियानले कानुनी शासन बलियो बनाउने र न्यायिक निर्णय कार्यान्वयनमा सहयोग पुग्ने प्रहरीको विश्वास छ ।