बन्यजन्तु आक्रमणले त्रसित बाँके–१: गौडेल भन्छन्– ‘मानव सुरक्षा पहिलो प्राथमिकता’

बाँके । बाँके राष्ट्रिय निकुञ्ज आसपासका क्षेत्रमा पछिल्लो समय बढ्दै गएको बन्यजन्तु आक्रमणले आम नागरिकको ज्यान र सुरक्षामा गम्भीर चुनौती थप्दै गएको छ। विशेषगरी बाघ र चितुवाको आक्रमण भयावह बन्दै जाँदा बाँके निर्वाचन क्षेत्र नम्बर १ का दर्जनौँ नागरिकले अकालमै ज्यान गुमाएको तथ्यांकले देखाउँछ।

आगामी फागुन २१ गते हुने प्रतिनिधि सभा सदस्य निर्वाचनमा बाँके–१ बाट नेपाली कांग्रेसका उम्मेदवार नारायण प्रसाद गौडेलले बन्यजन्तु आक्रमणको समस्यालाई प्रमुख सुरक्षा एजेन्डाका रूपमा अघि सारेका छन्। बाँके राष्ट्रिय निकुञ्जका कारण स्थानीय बस्ती असुरक्षित बन्दै गएको उल्लेख गर्दै उनले महिनौँपिच्छे बाघ तथा चितुवाको आक्रमणमा मानिसले ज्यान गुमाउनुपरेको घटनाप्रति गहिरो दुःख व्यक्त गरे।

“बन्यजन्तु संरक्षणका नाममा मानव जीवन असुरक्षित हुनु कदापि स्वीकार्य छैन,” गौडेलले भने, “आम नागरिकको जीवन रक्षा पहिलो प्राथमिकता हो।” उनका अनुसार हाल प्रचलनमा रहेको बन्यजन्तु संरक्षण ऐन, २०२९ समयसापेक्ष नभएकाले त्यसलाई संशोधन गरी जनमुखी र सुरक्षामैत्री बनाउनु अपरिहार्य भइसकेको छ।

स्थानीयवासीहरूका अनुसार खेतबारीमा काम गर्ने किसान, दाउरा–घाँस संकलनमा जाने महिला तथा विद्यालय जाने बालबालिकासमेत बन्यजन्तु आक्रमणको उच्च जोखिममा छन्। कतिपय घटनामा बाघ बस्तीमै पसेर आक्रमण गरेको उदाहरणले सुरक्षा व्यवस्थाप्रति गम्भीर प्रश्न उठाएको उनीहरूको भनाइ छ।

गौडेलले निकुञ्ज व्यवस्थापन, सुरक्षा निकाय र स्थानीय सरकारबीच प्रभावकारी समन्वय आवश्यक रहेको बताए। साथै उनले जोखिमयुक्त क्षेत्रमा सुरक्षा व्यवस्था मजबुत बनाउने, क्षतिपूर्ति प्रक्रिया सहज गर्ने र दीर्घकालीन समाधानका लागि कानुनी सुधार अपरिहार्य रहेको उल्लेख गरे। आम जनताको सुरक्षाका लागि आफू अग्रपंक्तिमा उभिने प्रतिबद्धता पनि उनले व्यक्त गरे।

स्थानीय बासिन्दाहरू भन्छन्, “बन्यजन्तुको त्रासले सामान्य जीवन जिउनै गाह्रो भएको छ। यो समस्या समाधानका लागि आवाज उठाउने र कानुन संशोधनसम्म पहल गर्ने नेता आवश्यक छ।”

बन्यजन्तु आक्रमणका कारण उत्पन्न सुरक्षा चुनौतीलाई राष्ट्रिय मुद्दाका रूपमा उठाउँदै आएको गौडेलको एजेन्डाले यस क्षेत्रका नागरिकको सुरक्षा सुनिश्चित हुने अपेक्षा बढाएको स्थानीयहरूको भनाइ छ।