बर्दियामा अपराध नियन्त्रण र निर्वाचन सुरक्षामा कडाइका साथ लाग्न डीआईजी खत्रीको निर्देशन

निरक बिक/बर्दिया । लुम्बिनी प्रदेश प्रहरी प्रमुख डीआईजी भूपेन्द्र बहादुर खत्रीले जिल्लाको आन्तरिक शान्ति–सुरक्षा मजबुत बनाउनुका साथै आगामी फागुन २१ गते हुने निर्वाचनको सुरक्षामा गम्भीर भएर खटिन प्रहरी कर्मचारीलाई निर्देशन दिएका छन्।

आज जिल्ला प्रहरी कार्यालय बर्दियाको निरीक्षणका क्रममा डीआईजी खत्रीले अपराध नियन्त्रण, शान्ति–सुरक्षा कायम, ट्राफिक व्यवस्थापन, लागुऔषध नियन्त्रण तथा सीमा अपराध नियन्त्रणमा निर्मम भएर लाग्न निर्देशन दिएका हुन्।

निरीक्षणका क्रममा उनले प्रहरी कर्मचारीको व्यक्तिगत टर्नआउटको समेत निरीक्षण गर्दै कार्यालयका सबै शाखा, कार्यालय  परिसरभित्र रहेका ब्यारेक, भान्सा तथा खाने मेस, क्यान्टिन र हिरासत कक्षको अवलोकन गरेका थिए।

डीआईजी खत्रीले सबैभन्दा पहिला प्रहरी कर्मचारीको चालचलन सही हुनुपर्नेमा जोड दिँदै जिम्मेवारी कर्तव्यनिष्ठ र इमानदारीपूर्वक निर्वाह गर्न निर्देशन दिए। गलत कार्य जोसुकैले गरे पनि कानुनको दायरामा ल्याउन पछि नहट्ने उनले स्पष्ट पारे।

अपराध नियन्त्रणतर्फ गम्भीर हुन निर्देशन दिँदै उनले समाजमा भय फैलाउने तथा सामाजिक विकृति बनिरहेका लागुऔषध कारोबारीविरुद्ध खरो रूपमा उत्रन जिल्ला प्रहरी प्रमुखसहित उपस्थित विभिन्न प्रहरी इकाई प्रमुख तथा सम्पूर्ण सकल दर्जालाई निर्देशन दिए।

त्यसैगरी उनले सवारी दुर्घटना न्यूनीकरणलाई प्राथमिकतामा राख्दै जनमानसलाई सचेतनामूलक कक्षा सञ्चालन गर्न तथा देखिएका कमजोरी र त्रुटी सुधार गर्नसमेत निर्देशन दिएका थिए।

निरीक्षणका क्रममा डीआईजी खत्रीले महिला, बालबालिका तथा जेष्ठ नागरिकको संरक्षणमा विशेष ध्यान दिनुपर्नेमा जोड दिँदै जिल्लाको विपद् व्यवस्थापनसम्बन्धी तयारीबारे पनि जानकारी लिएको जिल्ला प्रहरी कार्यालय बर्दियाले जनाएको छ।