निर्वाचन सुरक्षामा कडा निगरानी, सातै प्रदेशमा एआईजी खटाइयो, (कसलाई कहाँ)?

काठमाडौँ । प्रतिनिधिसभा सदस्य निर्वाचनको सुरक्षा तयारी अनुगमन गर्न प्रहरी प्रधान कार्यालयले सबै प्रदेशमा एआईजीहरू खटाएको छ । सातै प्रदेशको सुरक्षा चुनौती मूल्याङ्कन गर्न एआईजीहरू फिल्डमा खटिएका हुन् ।

सुदूरपश्चिममा एआईजी हिमालय कुमार श्रेष्ठ, मधेसमा एआईजी डम्बर बिक, गण्डकीमा डा. मनोज केसी, बागमतीमा शिद्धी बिक्रम शाह, कर्णालीमा सुशिल सिंह राठौर, कोशीमा राजन अधिकारी र लुम्बिनीमा एआईजी उमा प्रसाद चतुर्वेदी खटाइएका छन् ।

मधेस प्रदेशलाई सबैभन्दा संवेदनशील मानिएको छ । फागुन २१ मा हुने निर्वाचनभन्दा दुई दिनअघि होली पर्व परेकाले त्यसले असर पार्न सक्ने आकलन गरिएको छ ।

एआईजीहरूले प्रदेश र जिल्लास्तरमा सुरक्षा तयारी, साधन–स्रोत र संवेदनशील क्षेत्रको अध्ययन गरी प्रतिवेदन बुझाउनेछन् । सोही प्रतिवेदनका आधारमा अन्तिम सुरक्षा रणनीति तय गरिने प्रहरी प्रधान कार्यालय स्रोतले जनाएको छ ।