बन्दुक र पेस्तोलसहित दुई जना प्रहरीको नियन्त्रणमा

काठमाडौं । प्रहरीले बन्दुक र पेस्तोलसहित दुई जनालाई पक्राउ गरेको छ। मोरङको सुन्दरहरैँचा नगरपालिका–२ बेलडाँगी बस्ने २८ वर्षीय सिलास लिम्बुलाई मेड इन युएसए लेखिएको एक थान पेस्तोल, दुई थान हेण्डसेट र भरूवा बन्दुकजस्तो देखिने काठको हतियारसहित  पक्राउ गरेको हो।

इलाका प्रहरी कार्यालय बेलबारीबाट खटिएको प्रहरी टोलीले सिलास लिम्बुको घरमा तलासी लिँदा उक्त हतियार तथा सामग्री फेला पारेपछि उनलाई नियन्त्रणमा लिएको प्रहरीले जनाएको छ।

थप अनुसन्धानका क्रममा ती हतियार तथा हेण्डसेट सुन्दरहरैँचा नगरपालिका–३ बस्ने प्रेमबहादुर गुरुङबाट लिएको खुलेपछि प्रहरीले उनलाई समेत पक्राउ गरेको छ।

घटनाका सम्बन्धमा आवश्यक अनुसन्धान भइरहेको र कानुनी प्रक्रिया अगाडि बढाइएको प्रहरीले जानकारी दिएको छ।