बाँके - संग्रामपुर सडकमा तीनवटा मोटरसाइकल ठोक्किँदा दुई जनाको मृत्यु

काठमाडौं । तीनवटा मोटरसाइकल ठोक्किँदा दुई जनाको मृत्यु भएको छ। सर्लाहीको  ईश्वरपुर नगरपालिका–१३ अन्तर्गत पर्ने बाँके–संग्रामपुर सडकखण्डको ठिल्ला नजिक तीनवटा मोटरसाइकल आपसमा ठोक्किँदा भएको दुर्घटना दुई जनाको मृत्यु भएको प्रहरीले जानकारी दिएको छ।

जिल्ला प्रहरी कार्यालय सर्लाहीका अनुसार बीआर ३० एआर ३४५८, बीआर ३० एपी ३८०९ र एचपी ५५ सी ०६२३ नम्बरका मोटरसाइकल बुधबार राति दुर्घटनाग्रस्त अवस्थामा रहेको सूचना प्राप्त भएपछि प्रहरी चौकी गौरीशंकरबाट प्रहरी सहायक निरीक्षक लिलानाथ मिश्राको नेतृत्वमा टोली खटिएको थियो।

घटनास्थलबाट चार जनालाई घाइते अवस्थामा उद्धार गरी लालबन्दीस्थित मोडल अस्पताल लगिएको थियो। त्यसमध्ये गम्भीर अवस्थामा रहेका दुई जनालाई थप उपचारका लागि प्रादेशिक अस्पताल मलंगवा रिफर गरिएको थियो।

प्रहरीका अनुसार हरिपुर्वा नगरपालिका–९ मिर्चैयाका अन्दाजी ३०–३५ वर्षका मुकेश राय र सोही स्थानका करिब सोही उमेर समूहका रामज्ञान रायको उपचारकै क्रममा मृत्यु भएको हो।

दुर्घटनामा घाइते भएका हरिपूर्वा–९ कै २२ वर्षीय विक्रम राय र ४२ वर्षीय विश्वास रायको अवस्था सामान्य रहेको प्रहरीले जनाएको छ। उपचारपछि उनीहरूलाई इलाका प्रहरी कार्यालय केशरगन्जको नियन्त्रणमा राखिएको छ। घटनाबारे थप अनुसन्धान भइरहेको प्रहरीले जानकारी दिएको छ।