बाँकेसहितका तीन स्थानबाट अवैध लागुऔषध ब्राउनसुगरसहित तीन जना पक्राउ

काठमाडौं । बाँके, दाङ र बर्दियाका विभिन्न स्थानबाट प्रहरीले अवैध लागुऔषध ब्राउनसुगरसहित तीन जनालाई पक्राउ गरेको छ।

बाँकेको कोहलपुर नगरपालिका–११ सिद्धनगरमा डेरा गरी बस्ने २८ वर्षीय गोबिन्द सुनारलाई सोमबार साँझ १ सय २० मिलिग्राम ब्राउनसुगरसहित प्रहरीले पक्राउ गरेको हो। इलाका प्रहरी कार्यालय कोहलपुरबाट खटिएको प्रहरी टोलीले उनको कोठा तलासी गर्ने क्रममा उक्त लागुऔषध फेला पारेपछि उनलाई नियन्त्रणमा लिएको प्रहरीले जनाएको छ।

त्यसैगरी दाङको तुलसीपुर उपमहानगरपालिका–५ बाट अवैध ब्राउनसुगर ५ सय ३० मिलिग्रामसहित तुलसीपुर उपमहानगरपालिका–७ डाँडापातु बस्ने १८ वर्षीय एक किशोर पक्राउ परेका छन्। इलाका प्रहरी कार्यालय तुलसीपुरबाट खटिएको प्रहरीले उनलाई नियन्त्रणमा लिएको हो। प्रहरीले उनको साथबाट बा.७६ प १७१७ नम्बरको मोटरसाइकल समेत बरामद गरेको छ।

यसैबीच बर्दियाको गुलरिया नगरपालिका–११ गणेशपुरबाट अवैध ब्राउनसुगर ३ ग्राम ७ सय ७० मिलिग्रामसहित मधुबन नगरपालिका–७ शुक्रबस्ती बस्ने २६ वर्षीय गौरब पुन मगरलाई प्रहरीले पक्राउ गरेको छ। प्रहरी चौकी महम्दपुरबाट खटिएको टोलीले उनलाई उक्त पदार्थसहित नियन्त्रणमा लिएको हो।

पक्राउ परेका तीनै जनामाथि लागुऔषध सम्बन्धी कसूरमा थप अनुसन्धान भइरहेको प्रहरीले जनाएको छ।