विद्युतीय कारोबार ऐन मुद्दाका ४३ वर्षीय फरार अभियुक्त पक्राउ

काठमाडौँ । विद्युतीय कारोबार ऐन अन्तर्गतको मुद्दामा (साइबर अपराध )  फरार रहेका एक व्यक्तिलाई प्रहरीले काठमाडौँबाट पक्राउ गरेको छ।

पक्राउ पर्नेमा झापा जिल्ला, गौरादह नगरपालिका–५ स्थायी घर भएका तथा हाल काठमाडौँ महानगरपालिका–४ सुकेधारामा बसोबास गर्दै आएका ४३ वर्षीय रविरत्न चुडाल रहेका छन्।

काठमाडौँ उपत्यका अपराध अनुसन्धान कार्यालय टेकुको विशेष टोलीले बिहीबार सुकेधारा क्षेत्रबाट उनलाई नियन्त्रणमा लिएको जनाएको छ। विद्युतीय माध्यमको दुरुपयोग गर्दै कानुन विपरीत गतिविधि गरेको आरोपमा उनीविरुद्ध मुद्दा दर्ता भएको थियो र त्यसपछि उनी फरार रहँदै आएका थिए।

प्रहरीका अनुसार लामो समयदेखि उनको खोजी भइरहेका बेला प्राप्त गोप्य सूचनाका आधारमा काठमाडौँमै लुकिछिपी बसिरहेको अवस्थामा उनलाई पक्राउ गरिएको हो।

पक्राउपछि आवश्यक कानुनी प्रक्रिया अघि बढाउन उनलाई इलाका प्रहरी कार्यालय धरान, सुनसरी पठाइएको प्रहरीले जनाएको छ।